Tung rôh lăm pôu păng ‘nâng troh Kŏng hòa Phần Lan, hâi lơ 21/10, pôa Tô Lâm, Kăn xiâm pơkuâ hnê ngăn cheăng Đảng prế kơdrâi pôa cho jâ Ngô Phương Ly hiăng trâm kăn ƀô̆, mâu ngế cheăng ƀă mâu ngế ki teăng mâ Việt Nam ƀă ngế ki teăng mâ mâu kuăn pơlê Việt Nam ki rêh ối cheăng kâ a Phần Lan, Đan Mạch, Thụy Điển ƀă Na Uy.

Kăn xiâm pơkuâ hnê ngăn cheăng Đảng ƀriê lo têa mâ hlo mâu hiâm mơno pâ nhuô̆m dêi vâi krâ kuăn pơlê Việt Nam ki rêh ối cheăng kâ a kong têa vâi – mâu kăn teăng mâ túa lĕm tro veăng gum tơbêng tơrŭm tơroâ pơla Việt Nam ƀă mâu kong têa peăng Kơnhŏng châu Âu. Kăn xiâm pơkuâ hnê ngăn cheăng Đảng tối nhên, Đảng ƀă Tơnêi têa đi đo ngăn kuăn pơlê Việt Nam ki rêh ối cheăng kâ a kong têa ê cho môi tiah tơdroăng ki ôh tá chiâng tơklâ dêi hdroâng mơngế, cho ivá kơnía git ăm tơdroăng cheăng mơjiâng ƀă rak vế Tơnêi têa.

Tối ‘na tơdroăng cheăng kâ rêh ối pơlê pơla ƀă tơdroăng cheăng hbrâ rơnáu ăm Hneăng hôp XIV dêi Đảng, Kăn xiâm pơkuâ hnê ngăn cheăng Đảng tối nhên, tơnêi têa dế mot tung hneăng ki mơnhông nếo, tơmiât troh mâu tơdroăng pơkâ pêi cho pro kro mơdrŏng ăm kuăn pơlê, tơnêi têa ó rơdêi, tơniăn krê, tơdâng, rơkê.