Kơxo lơ 3/2, Ƀơrô cheăng Tíu xiâm Đảng hiăng po rôh trâm mâ “Koh mơnê Đảng – Hâk phiu rơnó Hơngui”, rơkâu Têt kăn ƀô̆, kong chưk, ngế pêi cheăng Ƀơrô cheăng tíu xiâm Đảng. Teăng mâ Khu xiâm pơkuâ tơdroăng kal kí, Khu xiâm pơkuâ hnê ngăn Đảng, pôa Tô Lâm, Kăn xiâm pơkuâ hnê ngăn cheăng Đảng mơnhên tối khât mâu tơdroăng ki klêi kơ’nâi mâu kăn ƀô̆, kong chưk, viên chưk ngế pêi cheăng Ƀơrô cheăng tíu xiâm Đảng hiăng pêi klêi tung tơdroăng cheăng tí tăng, ‘nâi plĕng, gum tơdroăng cheăng pơkuâ, hnê mơhno dêi tíu xiâm Đảng, Khu xiâm pơkuâ tơdroăng kal kí, Khu pơkuâ hnê ngăn cheăng Đảng. Kăn xiâm pơkuâ hnê ngăn Đảng ăm ‘nâi, tung hâi pêi cheăng ki apoăng dêi hơnăm nếo Ất Tỵ, Ƀơrô cheăng Tíu xiâm Đảng vêh tơkŭm po, ƀă mâu kơvâ cheăng ki tơdjâk troh tơdroăng cheăng nếo.

‘Na hnoăng cheăng tung la ngiâ, vâ pêi pro châ tơdroăng pơkâ thế kăn pơkuâ, hnê mơhno dêi Đảng ƀă Tơnêi têa, pôa Tô Lâm, Kăn xiâm pơkuâ hnê ngăn Đảng pơkâ thế, Ƀơrô cheăng Tíu xiâm Đảng pơtối pêi pro tro tơdroăng cheăng ki tơdjâk troh, tơdroăng cheăng pêi dêi tơná, mơnhông khôi túa tơrŭm, mơ-eăm pêi klêi mâu tơdroăng pơkâ ƀă rơkê plĕng, tơƀrê tâ hơnăm 2024, pêi klêi rơkê tơdroăng cheăng Khu pơkuâ tíu xiâm Đảng, Khu xiâm pơkuâ tơdroăng kal kí, Khu pơkuâ ngăn Đảng loi tơngah pơcháu.