Tối tơbleăng a tíu mơ’no tung um a Cao Bằng, pôa Tô Lâm, Kăn xiâm pơkuâ hnê ngăn Đảng tối, tơdroăng po leh tơbâ kơ Pôa Hồ vêh a tơnêi têa ôh ti to prếo vêh ngăn tơnêi tíu pơlê pơla, mê cho vêh ƀă Kuăn pơlê, ƀă ki khât dêi hdroâng mơngế, ƀă troăng hơlâ mơjiâng tơniăn krê, pơkuâ dêi kăch măng Việt Nam.  

Ing mâu tơdroăng pơkâ troăng hơlâ mơjiâng pro tíu kong ngo Cao Bằng, troăng prôk Kăch măng châ mơhnho nhên, troh tơdroăng ƀlêi trâng dêi kăch măng Khế Tơheăm hơnăm 1945, mơjiâng Tơnêi têa Việt Nam dêi Kuăn pơlê, xua Kuăn pơlê ƀă ing kuăn pơlê. Ai pơxúa kân dêi tơdroăng ‘na Pôa Hồ vêh a tơnêi têa ôh ti xê to tơbâ tơdroăng ton nah, mê ối cho ƀai hriâm ai pơxúa dêi rơxông.

A ngiâ um Pôa Hồ Chí Minh, Kăn xiâm hnê ngăn tơnêi têa hneăng hdrối nah ki nhoăm pâ, pin tơhrâ kô tơrŭm môi tuăn dêi rơpó, mơ-eăm prôk tiô troăng ki hiăng pơkâ rah xo; pơtối rak vế ki tơxâng  dêi tơmeăm khoăng ki kuăn mơngế ‘măn ăm; Pêi kơtăng, pêi cheăng tơƀrê, rêm râ, kơvâ cheăng, rêm kăn ƀô̆, đảng viên mơdêk hnoăng chăng pêi tơná a ngiâ kuăn Pơlê, mơ-eăm mơjiâng tơnêi têa Việt Nam hơniâp ro, tơniăn krê, pơkuâ djâ rơtế khên tơnôu ƀă rêh ro kro mơdrŏng, veăng ‘no hnoăng pro hơniâp ƀă mơnhông dêi kơpong ƀă tung lâp plâi tơnêi.