Pôa Tô Lâm, Kăn xiâm pơkuâ hnê ngăn Đảng, Kăn xiâm hnê ngăn tơnêi têa mơnhên tối mâu hnoăng veăng 'no dêi pôa Dmitry Medvedev ƀă tơdroăng mơnhông mơdêk dêi kong têa Rusi ƀă tơrŭm cheăng nhŏng o tiô khôi hmâ, kong têa tơrŭm cheăng ton troh tá ah tâi tâng Việt Nam - Rusi. Tối rơdêi Việt Nam đi đo nhuô̆m tơdroăng tŏng kum dêi Liên Xô hdrối nah ƀă kong têa Rusi nôkố, pôa Tô Lâm, Kăn xiâm pơkuâ hnê ngăn Đảng, Kăn xiâm hnê ngăn tơnêi têa pơkâ thế péa Đảng pơtối mơnhông hnoăng pơkuâ hnê mơhno tơrŭm cheăng pơla péa pâ; mơdêk tơpui tơno khu râ kăn, tơpui tơno tơdroăng kal kí ƀă tối ăm dêi pó túa ki rơkê tơtro 'na mơjiâng Đảng, pơkuâ tơnêi têa, mơnhông cheăng kâ - rêh ối pơlê pơla ƀă pơ'lêh kơxô̆.

Péa pâ môi tuăn mơdêk tơrŭm cheăng tung mâu kơvâ on tơhrik, têa châu, khoa hok - kong ngê̆, pơhlêh nếo tơmiât pêi rơkê, tuăn ngôa rơkê kuăn mơngế, hnê hriâm - hnê mơjiâng tuăn ngôa rơkê, logistics ƀă trâm mâ kuăn pơlê.