Teăng mâ Khu xiâm pơkuâ ngăn cheăng kal kí, Khu xiâm hnê mơhno hiăng diâp răng rơkâu kơ pôa Lê Hoài Trung, Kăn pơkuâ hnê ngăn Ƀơrô cheăng Đảng, pôa Tô Lâm ai tối nhên, ai hên troăng tơdjâ ki kal dêi Đảng, xua ing tơdroăng ki veăng hnê mơhno troăng dêi Ƀơrô xiâm Đảng, ki malối, tung pơla dế nôkố, tâi tâng khu xiâm kal kí dế pơkâ pêi pro ó rơdêi Tơdroăng Mơgêi dêi Khu xiâm pơkuâ hnê ngăn Đảng ‘na Tơdroăng rak vế, pêi pro tiô pơkâ kơxô̆ 18 ‘na rah xo iâ khu ngế ki pro pơkuâ cheăng kal kí, vâ hnoăng cheăng châ tơtro,  ai pơxúa, tơluâ, tơƀrê, hbrâ ăm roh hôp Kân Đảng ƀô̆ rêm râ troh a Hneăng hôp kân Đảng lâp tơnêi têa roh má 14, cho pơla roh ki vâ thăm mơdêk ki ó rơdêi dêi tơdroăng pêi cheăng kâ, pêi lo kế tơmeăm, xua mê, hnoăng cheăng dêi Ƀơrô pơkuâ ngăn cheăng Đảng cho tơdroăng ki kal kân khât păng ‘nâng.

Tơpui a roh tơdah xo hnoăng cheăng mê, pôa Lê Hoài Trung tơkêa kô kơhnâ khât tung tơdroăng hriâm tâp ƀă hriăn plĕng mâu tơdroăng ki nếo, thăm mơdêk hnoăng cheăng, kơdo mơ-eăm tung hnoăng cheăng, rơtế ƀă khu kăn pơkuâ ngăn Ƀơro cheăng rak vế tơdroăng ki tơrŭm cheăng, tơrŭm môi hiâm môi tuăn, pơtối mơdêk hnoăng cheăng “Môi tuăn môi mơno, tơrŭm, tơmiât pêi rơkê plĕng, kơhnâ khât, krâu ‘nâng, rak vế hnoăng luât ki pơkâ tơdroăng cheăng”, pơtối mơdêk mâu hnoăng cheăng ƀă ki châ tơƀrê ki rêm khu râ pơkuâ hneăng hdrối hiăng hnê tơdjâ, chôu ‘măn ăm.