Rơkâu hâk phiu mâu tơdroăng ki hiăng pêi pro rơkê ki Um Tơvi xiâm Việt Nam hiăng châ chiâng pêi pro tung mâu khế hơnăm hdrối mê hía nah, Pôa Tô Lâm - Kăn xiâm pơkuâ hnê ngăn cheăng Đảng tối ăm ‘nâi, tung hneăng ki mơnhông nếo, drêng tâi tâng Đảng, tâi tâng kuăn pơlê, tâi tâng khu lêng dế kơdo mơ-eăm pêi pro ƀlêi trâng Tơdroăng pơkâ dêi Hneăng hôp kân roh má 13 dêi Đảng, prôk troh a Hneăng hôp kân mâu kăn teăng mâ lâp tơnêi têa roh má 14, xua Um Tơvi xiâm Việt Nam kal athăm rế pro mơnhên i nhên dêi hnoăng cheăng, cho tíu ki xiâm vâ tơbêng ăm tuăn loi tơngah ƀă tơdroăng ki veăng vâ môi tuăn tung pơlê pơla.

Pôa Tô Lâm hiăng pâ thế, Um Tơvi xiâm Việt Nam thăm mơdêk tơdroăng ki pơhlêh cheăng, xúa kŏng ngê̆ tung pêi rêm kơvâ cheăng, mơnhông tơdroăng ki tơtro tung mơ’no mơđah um tung hên kơvâ, pêi cheăng tro tiô túa ki tơrŭm, tâi tâng athế xúa kŏng ngê̆ kơxô̆ chal nếo, djâ troăng ahdrối tung koai, xup, mơ’no mơđah, ƀă xing xoăng mơđah mâu um, mâu tơdroăng cho to tơdroăng ki tro păng ‘nâng, mơ’no tung hên túa, hên rơkong tơpui, ư̆ng dŭng kŏng ngê̆ ki rơkê plĕng vâ gum ăm kuăn pơlê cho kuăn pơlê ki rêh ối tung tơnêi têa ƀă kong têa vâi ê, veăng gum kring vế krá tơniăn hnoăng pơkuâ ngăn ‘na tơdroăng ki nếo ai dêi tơnêi têa, mơdêk inâi dêi Việt Nam tung lơ gât mơ’no mơđah um tơvi ki rơkê plĕng dêi lâp plâi tơnêi.