Kơxo hâi lơ 25/9, a Hngêi Kuô̆k hô̆i po hneăng hôp mâu kăn Đảng ƀô̆ Kuô̆k hô̆i rôh má 1, hneăng hơnăm 2025-2030. Hneăng hôp ai pơxá “Mơjiâng Đảng ƀô̆, krúa, rơdêi tâi tâng; Kan hnê ngăn Kuô̆k hô̆i pơ’lêh nếo rơdêi, mơdêk ki tơƀrê, pơxúa tung pêi cheăng,  chôa hvêa prôk a chal mơnhông kro mơdrŏng, rơkê plĕng, hơniâp dêi  hdroâng mơngế”. Tiô tối tơbleăng kal kí, tung hneăng hơnăm 2020-2025, Kuô̆k hô̆i hiăng pê klêi mâu tơdroăng pơkâ; pakĭng mê kăn hnê ngăn hbrâ, pêi pro teăm, tơƀrê hên tơdroăng nếo ai tiô pơkâ hơ'lêh nếo dêi tơnêi têa ing hnoăng pơkuâ dêi Đảng.

Krê tung tơdroăng cheăng mơjiâng, pê klêi luât pơkâ, luât ai hên hơ’lêh nếo. Tung mê, cho tơbleăng Pơkâ ‘mâi hơ’lêh , tơ’nôm mâu tơdroăng luât hơnăm 2013, mâu luât tơkŭm dêi mâu kăn, mâu pơkâ ‘na xing xoăng mâu tíu pêi cheăng râ kong pơlê, pro rế lĕm  mâu tíu pêi cheăng râ cheăm; pơkâ hên luât tơniăn rêh ối pơlê pơla krá tơniăn, ai pơxúa vâ pơxúa ăm kuăn pơlê. 

Pakĭng mê, tơdroăng séa ngăn rế cha apêi khât, tơdroăng tơpui kâ châ tơbleăng tŭm ... Veăng hôp ƀă tơbleăng a rôh hôp, pôa Tô lâm Kăn xiâm pơkuâ ngăn Đảng tối nhên tơnêi têa dế mot  tung mâu hơnăm mơnhông nếo pơkâ hên, kal thế rêm râ ủy đảng, mâu kăn Kuô̆k hô̆i, kăn ƀô̆, đảng viên, kŏng chưk, viên chưk mơnế pêi cheăng  thế mơdêk tâ nếo ki mơ-eăm kal kí, hơ’lêh nếo tuăn tơmiêt, mơ eăm pêi pro. 

Kăn xiâm pơkuâ hnê ngăn Đảng tối 2 pơkâ, 5 tơdroăng vâ pêi ki kal vâ hneăng hôp hneăng ki nếo, tung mê, kal mơdêk ki tro dêi kuăn pơlê tung tŭm tơdroăng cheăng dêi Kuô̆k hôi. Kuô̆k hô̆i  Việt Nam thế hmâ ƀă kuăn pơlê, cho Kuô̆k hô̆i  dêi kuăn pơlê, xua kuăn pơlê, ing kuăn pơlê- ôh tá xê to rơkong tơpui, mê tung luât, tơdroăng kơ êng, luât pơkâ ki kal, xuân thế pêi tro, hơniâp, phât tơtô, tơniăn krê dêi kuăn pơlê ƀă hơniâp lĕm dêi tơnêi têa.