A roh tơdah, Ngế xiâm pơkuâ Kŏng an tối nhên, Việt Nam ƀă Nhuk hiăng tơrŭm cheăng trâu hơngế tung hên kơvâ cheăng. Pôa Tô Lâm loi tơngah, tung la ngiâ, tơrŭm cheăng pơla péa tơnêi têa kô pơtối mơnhông mơdêk lĕm.

Pôa Tô Lâm pói vâ pôa Takebe Tsutomu hnê tối ăm ‘na troăng pêi la ngiâ péa pâ kô rơtế tơrŭm vâ kum kơdroh tơklâm rơxế ƀă hlâ mơngế xua tơklâm rơxế drô troăng kân a Việt Nam, xuân môi tiah mơhnhôk, mơdêk mâu kơ koan ki tơdjâk dêi Nhuk ai mâu tơdroăng tŏng kum, mơdêk ivá ăm khu Kan sát rak tơniăn troăng klông Việt Nam.

Pôa Tô Lâm xuân pâ thế pôa Takebe Tsutomu tơmâng hên tâ mê nếo mâu tíu cheăng kơjo séa ngăn, rah xo mâu lêng kŏng an kuăn pơlê, xuân môi tiah kum tơdjêp, tơrŭm cheăng pơla mâu tíu cheăng Khu xiâm pơkuâ Kŏng an ƀă Hngêi trung Đăi hok Việt – Nhuk.