VOV4.Xơ Đăng - Kơxê lơ 7/3, a Hà Nội, Đảng ủy Kŏng an Tơnêi têa, Khu xiâm ngăn Kŏng an tơkŭm po Tơdroăng tơbâ 112 hơnăm Hâi vâi kơdrâi lâp plâi tơnêi (8/3/1910 - 8/3/2022) ƀă trâm mâ mâu kăn cho vâi kơdrâi Kŏng an kuăn pơlê ki veăng hôp a rôh hôp mâu kăn vâi kơdrâi lâp tơnêi têa rôh má 13. Tơpui a rôh trâm mâ, pôa Tô Lâm, ngế xiam ngăn Kŏng an tối nhên, Đảng ủy Kŏng an Tơnêi têa, kăn pơkuâ Khu xiâm ngăn Kŏng an đi đo loi tơngah ƀă rơhêng vâ, rêm râ ngăn vâi kơdrâi tung Kŏng an kuăn pơlê pơtối hbrâ  rơnáu, rơkê plĕng hơ’lêh nếo rơdêi tơdroăng ki kal, túa pêi cheăng, tơdroăng tơ’noăng.

Pôa Tô Lâm, Ngế xiâm ngăn Kŏng an trâm mâ mâu kăn vâi kơdrâi Kŏng an kuăn pơlê

Pêi pro hơ’lêh ƀă mâu kế tơmeăm, túa pơkâ, xoăng cheăng tơtro ƀă hnoăng cheăng dêi tơná, tơtro ƀă tơdroăng ki pêi cheăng dêi vâi kơdrâi; pêi pro tro tơdroăng ki tí tăng ‘nâi plĕng mâu tơdroăng cheăng xua tơdroăng ki rơkê  plĕng dêi vâi kơdrâi. Pôa Tô Lâm rơhêng vâ rêm ngế kăn ƀô̆, hô̆i viên vâi kơdrâi kal hlê plĕng tơtro ‘na hnoăng cheăng, loi nhuô̆m tơdroăng cheăng ƀă kơhnâ, hbrâ rơnáu xêh, tơrŭm veăng tung mâu tơdroăng cheăng hô̆i, pêi pro tro tơdroăng tơ’noăng vâi kơdrâi, xo tơdroăng ki mê pro tơdroăng ki rơhêng vâ mơ-eăm, hriâm pât ƀă mơnhên dêi tơná.

Katarina Nga tơplôu ƀă tơbleăng