Khu xiâm Pơkuâ hnê ngăn Tíu xiâm Đảng hneăng XIV vâ môi tuăn păng ‘nâng tối tơbleăng, xing xoăng pôa Trần Cẩm Tú, Ngế cheăng tung Khu xiâm pơkuâ ngăn cheăng Kal kí pơtối rak hnoăng cheăng Má Môi Khu pơkuâ hnê ngăn.

Kơxê 23/1, a roh mơgêi hôp, pôa Trần Thanh Mẫn, Ngế cheăng tung Khu xiâm pơkuâ ngăn cheăng Kal kí, Kăn pơkuâ hnê ngăn Đảng ủi Kuô̆k hô̆i, Kăn xiâm hnê ngăn Kuô̆k hô̆i hiăng tối pơtâng ki hiăng klêi dêi Roh Hôp má môi Khu xiâm pơkuâ hnê ngăn Tíu xiâm, tung mê, ai ki mơnhên tối tơbleăng, xing xoăng mơngế ki pêi hnoăng cheăng Má Môi Khu pơkuâ hnê ngăn Hneăng XIV.

Khu xiâm Pơkuâ hnê ngăn Tíu xiâm Đảng hneăng XIV hiăng vâ môi tuăn ki kâ má môi, 200/200 Ngế cheăng tung Tíu xiâm Đảng ki păng ‘nâng ƀă ki hbrâ (tơ’mô 100%) tơbleăng pôa Trần Cẩm Tú, Ngế cheăng tung Khu xiâm pơkuâ ngăn cheăng Kal kí, Má Môi Khu pơkuâ hnê ngăn hneăng XIII, Kăn pơkuâ hnê ngăn Đảng ủi Tíu xiâm vêh pơtối pro Má Môi Khu pơkuâ hnê ngăn hneăng XIV.

Tiô kơ tơdroăng ki hiăng klêi tối tơbleăng dêi Khu xiâm pơkuâ hnê ngăn Tíu xiâm Đảng, Khu xiâm pơkuâ ngăn cheăng Kal kí hneăng XIV hiăng xing xoăng pôa Trần Cẩm Tú, Ngế cheăng tung Khu xiâm pơkuâ ngăn cheăng Kal kí vêh pêi hnoăng cheăng Má Môi Khu pơkuâ hnê ngăn.

Pôa Trần Cẩm Tú kot mâ hâi lơ 25/8/1961; pơlê xiâm nôu pâ: Kong pơlê Hà Tĩnh. Pôa cho Ngế cheăng tung Khu xiâm pơkuâ ngăn cheăng Kal kí: Hneăng XIII, Hneăng XIV; Kăn pơkuâ hnê ngăn Tíu xiâm Đảng: Hneăng XII (ing khế 6/2018), XIII (ing 4/2021), XIV; Ngế cheăng tung Tíu xiâm Đảng: Hneăng X (hbrâ), XI, XII, XIII, XIV; Má Môi Khu pơkuâ hnê ngăn hneăng XIII (ing 25/10/2024), XIV; Kăn teăng mâ Kuô̆k hô̆i: hneăng XV.

Pôa Trần Cẩm Tú hiăng pêi hên tơdroăng cheăng trối Phŏ Kăn Vi ƀan Séa ngăn Tíu xiâm Đảng; kăn pơkuâ hnê ngăn Đảng kong pơlê Thái Bình; Phŏ Ngăn Má Môi Vi ƀan Seá ngăn Tíu xiâm ƀă Ngế ngăn Vi ƀan Séa ngăn Tíu xiâm.