Phŏ Ngế pro xiâm hnê ngăn tơnêi têa pơkâ thế rôh hôp tơkŭm tối leăng, mơnhên tro tơdroăng báu phái nôkố a kơchơ tê mơdró kong têa ê ƀă tung tơnêi têa. Rơtế amê hlối pêi pro nhên xua tiah lâi drêng mot tung rơnó poê tâng châ báu hên tê ôh tá ai yă, tâng tê châ yă kơnâ báu ôh tá châ hên dế pro pá ăm kuăn pơlê ki mơdâ pêt báu.

Pakĭng mê, kal séa ngăn, tối tơbleăng ƀă ‘mâi rơnêu kơchơ mơdró báu phái tiô túa ki hbrâ rơnáu, krá tơniăn. Tơdrêng amê hlối kal ai mâu troăng hơlâ pêi pro tơdâng tơ’mô ton hâi khế, teăng ăm bu tŏng gum tung pơla ki kal pêi pro tơdrêng vâ rak vế tơniăn kơvâ báu phái dêi Việt Nam, gum kuăn pơlê ki pêi chiâk pơtối pêi ƀă tơdroăng cheăng pêi chiâk deăng.

Tiô tối tơbleăng, báu phái a tơnêi têa pin xuân ối rak vế pêt uâ ƀă tê ngi kong têa ê tâk tơniăn; krê hơnăm 2024, tê báu ngi kong têa ê dêi Việt Nam tâk troh 9 rơtuh tâ̆n ƀă kơxô̆ liăn châ xo ing tê báu ngi kong têa ê châ hên má môi 5,75 rơtal dollars. Tung 2 khế apoăng hơnăm kố, tê phái ngi kong têa ê dêi Việt Nam châ 1,1 rơtuh tâ̆n.