Mơnhên tối IC ICTAS cho grup pơkuâ ki châ vâi loi, ki rơkê ‘na mơjiâng pro hên tơraih tơƀai tung lâp plâi tơnêi, pôa Trần Hồng Hà, phŏ Ngế pro xiâm hnê ngăn tơnêi têa ăm ‘nâi, Chin phuh, Ngế pro xiâm hnê ngăn Chin phuh kal vâ ‘nâi plĕng khât, đi đo séa ngăn, pơkâ, ai mâu rôh hôp hnê mơhno nhên vâ mơdêk rĕng tơdroăng ki pro, rĕng pro klêi tơdroăng tơkêa Tơraih tơƀai lâp plâi tơnêi Long Thành.

Phŏ Ngế pro xiâm hnê ngăn tơnêi têa púi vâ IC ICTAS pơtối pêi cheăng ƀă mâu khu ki tơrŭm cheăng tê mâu kế tơmeăm vâ mơnhên châ hâi khế mơni kô chiâng vâ pro ‘nâng ‘nâi vâ pro klêi Hngêi tơdah tơmối tơraih tơƀai Long Thành rak tơniăn dâi, pơkâ thế krá ‘na kih thuât, tơƀrê ‘na cheăng kâ má môi.

Mơnê phŏ Ngế pro xiâm hnê ngăn tơnêi têa mơdoh chôu phut tơdah pôa Reha Denemec tối nhên mâu khu tơrŭm kô mơ-eăm tâi ivá, tăng mâu troăng kih thuât, pro ƀă hên ki ê vâ pro iâ hâi khế pro klêi tơdroăng xo pro; tơdrêng amê hlối púi vâ pro tơ’nôm mâu tơdroăng tơkêa hngêi trăng troăng klông gum ăm tơdroăng pơto chơ tơmối, tí tăng Tơraih tơƀai lâp plâi tơnêi Long Thành.