Péa pâ hiăng môi tuăn kal pơtối thăm tơrŭm tiô khôi vâi krâ nhŏng o ƀă tơrŭm lĕm tro ing thăm tơrŭm tâ mê nếo tơpui tơno khu kăn mâu râ, ki má mối cho râ kăn xiâm. Péa kăn xiâm pơkuâ tơnêi têa tối péa tơnêi têa ối hên tơmeăm ki ai hlâu vâ mơnhông mơdêk tơrŭm cheăng tung mâu kơvâ cheăng tê mơdró, mơ’no liăn cheăng, pêi chiâk deăng ƀă hía hé; môi tuăn thăm tơpui tơno khu tê mơdró, tơrŭm tơkŭm po mâu tơdroăng ki kal thăm mơ’no liăn tê mơdró, mơ’no liăn cheăng a rêm kong têa tung la ngiâ, pro tơ’lêi hlâu ăm mâu tơmeăm khoăng tê ngi kong têa ê tơmeăm ki má môi dêi pó môi tiah tơmeăm pêi lo ing chiâk deăng, phái, hmân ếo, phon rơvât...tung kơchơ tê mơdró dêi pó.

Mơhnhôk ƀă pro tơ’lêi hlâu ăm khu tê mơdró péa pâ thăm tơdjêp, veăng mơ’no liăn cheăng mâu tơdroăng tơkêa bro rêm tơnêi têa. Vâ pêi pro châ tơƀrê mâu troăng pêi kơpêng mê, péa pâ môi tuăn kal hbrâ lĕm tro ƀă rĕng tơkŭm po hneăng hôp má 6 Vi ƀan tơrŭm Việt Nam – Egipto; thăm pêi pro tŭm luât ăm tơrŭm cheăng hên pâ pơla péa tơnêi têa.