VOV4.Xơ Đăng - Kơxo lơ 24/1, Thươ̆ng tươ̆ng Trần Quang Phương, Kăn xiâm phŏ hnê ngăn Kuô̆k hô̆i lăm pôu, rơkâu Têt kăn ƀô̆, mô đô̆i mâu đông lêng pro đông tung kong pơlê Bình Định, kŏng nhân a mâu kơpong hngêi kơmăi kơmok dêi kong pơlê. A tơring Tây Sơn, pôa Trần Quang Phương, Kăn xiâm phŏ hnê ngăn Kuô̆k hô̆i kheăn kơdeăn mâu tơdroăng mơ-eăm ki Đảng ƀô̆, khu lêng ƀă kuăn pơlê akố châ tơƀrê tung mâu hâi khế hiăng hluâ.

Pôa Trần Quang Phương, Kăn xiâm phŏ hnê ngăn Kuô̆k hô̆i diâp kơxuô tơmeăm ăm rơpŏng ai hnoăng tơnêi têa

Kăn xiâm phŏ hnê ngăn Kuô̆k hô̆i pơkâ thế kong pơlê pơtối mơnhông mơdêk hiâm mơno rŭm môi tuăn, pêi pro tơdâng tơ’mô mâu troăng vâ mơnhông mơdêk kong pơlê, rak tơniăn tơdroăng rêh ối pơlê pơla. Roh kố, pôa Trần Quang Phương hiăng lăm kơ-êng, mơhnhôk ƀă diâp kơxuô tơmeăm Têt 50 rơpŏng ai troăng hơlâ tŏng kum, rơpŏng kơtiê a cheăm Bình Thành, tơring Tây Sơn; Lăm pôu, rơkâu Têt ƀă diâp kơxuô tơmeăm ăm 100 ngế kŏng nhân dêi Kŏng ti pêi cheăng tiô rơnó môi khu pơchoh chêp hmân ếo Able Việt Nam a kơpong Hngêi kơmăi kơmok Phú Tài; Lăm pôu ƀă rơkâu Têt Trung đoân Kan sát kơ đô̆ng – Khu xiâm pơkuâ Kŏng an

            A Sa Ly tơplôu ƀă tơbleăng