A hneăng hôp, mâu kăn khěn kơdeăn mâu ƀai chêh ki veăng tơ’noăng ai ‘no hên tơdroăng hriăn tơmiât chêh hên túa, tơtro, tơƀrê ‘na tơdroăng kal, chêh tơbleăng hên rôh. Mâu bai chêh hiăng chêh tối tŭm tơdroăng pơxá, tiô tơdroăng pơkâ dêi Pri hlá tơbeăng Diên Hồng rôh má môi, mâu tơdroăng chêh tro tiô tơdroăng ki hlo ai khât rêm hâi tung rêh ối - cheăng kâ, malối chêh hên tâ ‘na tơdroăng cheăng, hnoăng cheăng pêi, ivá cheăng ki rơkê lơ ôh, tơdroăng cheăng dêi kuô̆k hô̆i, Hô̆i đong hnê ngăn kuăn pơlê rêm râ, mâu ngế kuăn pơlê rah xo ki pêi cheăng rơkê, ki châ pơ-eăng hên tung kuăn pơlê.

Pôa Trần Thanh Mẫn tối nhên, Pri hlá tơbeăng Diên Hồng cho hneăng tơ’noăng vâ pơ-eăng mâu ngế chêh hlá tơbeăng ki chêh ‘na tơdroăng kuăn pơlê rah xo, kơ koan kuăn pơlê rah xo, pâ thế tơkâ luâ tơdroăng pá tơvâ tơvân ki hâi tro tung rôh tơ’noăng apoăng, pơtối rak tơniăn ‘na tơbleăng pêi pơxúa hneăng tơ’noăng Diên Hồng rôh má 2. Tung mê, ‘mâi rơnêu, tơ’nôm luât tơ’noăng Diên Hồng rôh má 2 ah vâ mơhnhôk ai hên tơdroăng chêh châ veăng tơ’noăng.