A roh pêi cheăng, Kăn xiâm hnê ngăn Kuô̆k hô̆i kheăn kơdeăn khu kŏng an djâ troăng ahdrối tung tơdroăng rah bro lế lĕm khu râ kăn pêi cheăng tơnêi têa tơniăn rơdêi, tro khăp, xêt khât, châ tơƀrê. Troăng pêi kố châ mâu kong pơlê, khu xiâm kơvâ ki ê hriâm tâp pêi tiô. Hơnăm 2025 ai hên hâi leh kân dêi tơnêi têa, ki má lối cho 80 hơnăm hâi mơjiâng tơnêi têa xuân cho 80 hơnăm mơjiâng khu kŏng an kuăn pơlê, pôa Trần Thanh Mẫn, Kăn xiâm hnê ngăn Kuô̆k hô̆i pói vâ khu kŏng an pêi kêi đeăng hnoăng cheăng hơnăm 2025 gum tung hnoăng mơjiâng gâk kring Tơnêi têa ƀă veăng rơtế Kuô̆k hô̆i tung tơdroăng mơjiâng luât, séa ngăn tơdroăng pêi pro.

Pôa Trần Thanh Mẫn pơkâ thế khu kŏng an pêi pro mâu luât hiăng châ Kuô̆k hô̆i tơbleăng ăm pêi pro a mâu hneăng hôp dêi Kuô̆k hô̆i, tung mê mơdêk pơtâng tối ăm kuăn pơlê hlê plĕng ƀă pêi pro tro luât. Pôa Lương Tam Quang, Ngế xiâm pơkuâ Khu xiâm Kŏng an mơnhên, pơtối pêi tiô ton mâu tơdroăng châ tơƀrê tung tơdroăng rah bro lế lĕm khu râ kăn pêi cheăng, kơvâ kŏng an hbrâ vâ pêi pro tơdroăng rah bro lế lĕm, tro  khăp ing tơnêi têa troh kong pơlê.