Ki nhên, athế rak tơniăn troăng hơlâ, luât séa ngăn tung tơdroăng ki ai khât, prôk hdrối po troăng ăm mơnhông, xo kuăn pơlê ƀă khu mơdró kâ cho ngế ki xiâm, xo ki rơkê plĕng, ki tơƀrê pêi pro dêi troăng hơlâ luât pro loăng rêk vê tơdroăng cheăng mơjiâng pro luât. Kăn xiâm hnê ngăn Kuô̆k hô̆i tối nhên, hneăng hôp mơhno ivá khŏm mơ-eăm dêi Kuô̆k hô̆i, Chin phuh ƀă mâu kơ koan tung rĕng pơhlêh troăng mâu troăng hơlâ pơkâ dêi Đảng, pêi châ tơdroăng rơhêng vâ pơkâ thế mơnhông tơnêi têa, pôi tá pêi pro hrá, hâi khế tơ’lêi hlâu châ tơkâ luâ.

Kăn xiâm hnê ngăn Kuô̆k hô̆i pơkâ thế mâu kăn hriăn ngăn nhên hlá mơ-éa, kơhnâ tơpui tơno, veăng tơpui tối ƀă mâu tơdroăng ki xiâm ối ai mâu rơkong tơpui tối phá dêi rơpó, malối cho mâu tơdroăng ki tơdjâk tơdrêng troh kuăn pơlê ƀă khu mơdró kâ; tơdrêng amê hlối pơkâ thế rêm tơdroăng tơkêa luât, tơdroăng pơkâ athế châ hbrâ rơnáu nhên, mơnhên tối tŭm ki tơdjâk ƀă mơhnhôk tuăn mơno dêi mâu khu ki rơkê, khu ki hriăn ‘na khoa hok, khu mơdró kâ vâ mơdêk ki rơkê plĕng tung mơjiâng luât.