A Hneăng hôp, mâu kăn teăng mâ hiăng tơmâng rơkong tơpui tơno tơdjâk troh Pơkâ pêi cheăng dêi Khu pơkuâ Đảng ƀô̆ Kuô̆k hô̆i, hneăng hơnăm 2020 – 2025; tơdroăng xing xoăng hnoăng cheăng inhên ƀă mâu kăn cheăng tung Khu pêi pro, Kăn cheăng tung Khu hnê mơhno; tơdroăng mơjiâng mâu kơ koan pơkuâ cheăng tơbleăng, gum cheăng dêi Đảng ủi ƀă Têk kŏng môi tuăn ăm pêi pro Pơkâ Hneăng hôp roh má môi Khu pơkuâ Đảng ƀô̆ Kuô̆k hô̆i.

Xông tơpui mơgêi hneăng hôp, pôa Trần Thanh Mẫn, Kăn xiâm hnê ngăn Kuô̆k hô̆i tối nhên mâu đảng viên kal djâ troăng ahdrối, ôh tá ‘nhi ‘nhơ, kơtăng, khŏm pêi ƀă tơdroăng cheăng ki nhên nếo ai tơmeăm; tơdrêng amê pơkâ thế pơtối mơdêk tơdroăng hbrâ, mơdât kâ kơhveăm liăn ngân, tơdroăng ki ôh tá lĕm tro, mơ’nhê liăn tê kơtê, mơdêk châ tơƀrê tơdroăng séa ngăn, lăm ngăn ƀă klêi séa ngăn tung Kuô̆k hô̆i.

Hbrâ tâi tâng mâu tơdroăng ăm Hneăng hôp Đảng ƀô̆ mâu râ tung Đảng ƀô̆ Kuô̆k hô̆i, vâ hâk tơngăm Hneăng hôp roh má XIV dêi Đảng. ‘Na pơkuâ pêi pro tro hnoăng cheăng kal kí, Kăn xiâm hnê ngăn Kuô̆k hô̆i pơkâ thế pơtối tơkŭm pơkuâ, hnê mơhno pêi pro ai châ tơƀrê mơjiâng, pêi kêi đeăng luât hơnăm 2025 ƀă hnê mơhno dêi pôa Tô Lâm, Kăn xiâm pơkuâ hnê ngăn Đảng ‘na pơhlêh nếo xiâm kối tơmiât mơjiâng luât, ngăn kố cho môi tơdroăng ki châ tơƀrê păng ‘nâng tung pêi kêi đeăng pơkâ pêi hơnăm 2025, pro xiâm kối ăm Kuô̆k hô̆i hneăng má XVI, hneăng hơnăm 2026 – 2031.