Kơxo lơ 7/9, a Hàn Quốc, pôa Cho Jeong Sik, Kăn xiâm hnê ngăn Kuô̆k hô̆i pơkuâ po leh tơdah kân krip tơdah pôa Trần Thanh Mẫn ƀă Khu kăn xiâm Việt Nam. Klêi kơ’nâi leh tơdah, péa ngế Kăn xiâm hnê ngăn Kuô̆k hô̆i tơpui tơno. Péa pâ tơpui tơno trâu rơdâ ‘na tơdroăng cheăng dêi rêm tơnêi têa ƀă mâu troăng hơlâ mơdêk tơrŭm cheăng pơla péa pâ.

Péa pâ môi tuăn rak vế đi đo tơdroăng ki pơtroh khu râ kăn trâm mâ dêi rơpó tơpui ‘na tơdroăng cheăng tung la ngiâ; tơbleăng troăng ngân tơrŭm cheăng kâ tung tơdroăng nếo; mơ-eăm ăm kơxô̆ liăn pêi lo ing tê mơdró pơla péa châ 100 rơtal USD tung hơnăm 2026 ƀă tơmiât troh 150 rơtal USD a hơnăm 2030. Hàn Quốc pơtối kơjo gum ODA ôh tá êa mơdrếo ăm Việt Nam; thăm mơdêk tơrŭm cheăng khoa hok, kong ngê̆ chal nếo ƀă pro tơ’lêi hlâu vâ khu mơdró kâ péa tơnêi têa ‘no liăn cheăng tơniăn, ton troh tá ah.

Péa pâ hiăng môi tuăn po rơdâ tơrŭm cheăng hnê mâu ngế cheăng, túa lĕm tro, ôm hyô ƀă trâm mâ kuăn pơlê; tơmâng ngăn rak vế hnoăng pơxúa ăm kuăn pơlê Việt Nam a Hàn Quốc ƀă mơngế Hàn Quốc a Việt Nam, tung mê ai dâng 100 rơpâu rơpŏng Việt Nam – Hàn Quốc.