A roh tơdah, péa pâ thăm tơpui tơno pơla khu râ kăn, ki má lối cho mâu khu râ kăn xiâm; pơtối thăm tơrŭm ƀă tŏng gum dêi pó a mâu hneăng hôp tơpui tơno hên pâ, ki má lối cho a Khu lâp kong têa, Tơdroăng pêi Ôh tá tơrŭm tung hnoăng cheăng la pơrá Tơpui nâl Pơhlăng... Mơnhên tơrŭm cheăng pơla péa tơnêi têa ‘na mơ’no liăn cheăng, cheăng kâ, tê mơdró tá hâi hên, Kăn xiâm hnê ngăn Kuô̆k hô̆i pơkâ thế péa pâ thăm tơpui tơno, tơdjêp tơdroăng kơchơ mơdró, roh tơ’lêi, tơdroăng ki rơdêi rêm pâ, ki má lối cho tung kơvâ pêi chiâk deăng.

Việt Nam hbrâ rơtế Cameroon ti tăng kơxô̆ liăn tŏng gum ing ngế má pái ăm mâu tơdroăng tơkêa bro tơrŭm mơnhông pêi chiâk deăng 3 pâ a Cameroon. Péa pâ rĕng tơdjêp tơpui tơno mâu Tơdroăng pơkâ ki kal môi tiah: Mơhnhôk ƀă tŏng gum mơ’no liăn, ví xo hnoăng mơhá má péa... mơjiâng tơdroăng tiô luât ăm tơrŭm cheăng pơla péa pâ.