Tơdah jâ Chea Kimtha, kăn teăng mâ kong têa Kul, pôa Trần Thanh Mẫn, Kăn xiâm hnê ngăn Kuô̆k hô̆i ƀă jâ Chea Kimtha, Kăn teăng mâ kong têa Kul phiu ro hlo, tơrŭm cheăng kâ pơtối cho tíu ki eăng ƀă pêi lo liăn tê mơdró pơla péa pâ hơnăm 2025 châ lối 11 rơtal dollars, tâk vâ chê 12% tâng pơchông ƀă hơnăm 2024; môi tuăn tối tơnêi ki rơlối, lôi chúa tơrŭm cheăng kâ pơla péa tơnêi têa ối hên, kal pơtối mơdêk tơrŭm cheăng păng ‘nâng ƀă châ tơƀrê tâ, mơ-eăm djâ pêi lo liăn tê mơdró pơla péa tơnêi têa châ pơkâ pêi 20 rơtal dollars môi tiah Kăn pơkuâ péa tơnêi hiăng pơkâ mơ’no.

Tơdah pôa Marc Knapper, Kăn teăng mâ kong têa Mih, pôa Trần Thanh Mẫn, Kăn xiâm hnê ngăn Kuô̆k hô̆i mơnhên Kuô̆k hô̆i Việt Nam hbrâ tơrŭm krá tơniăn ƀă Kuô̆k hô̆i kong têa Mih vâ kêi đeăng tiô luât tơ’lêi hlâu ăm tơrŭm cheăng pơla péa pâ, pro tơ’lêi hlâu vâ tơrŭm cheăng péa tơnêi têa châ pêi pro châ tơƀrê, krá tơniăn.