Kơxê hâi lơ 29/7 (tiô chôu tơnêi têa), a Tíu pêi cheăng khu lâp kong têa a kong têa Swis, drêng veăng hôp mâu kăn xiâm Kăn xiâm hnê ngăn Kuô̆k hô̆i  lâp plâi tơnêi rôh má 6, pôa Trần Thanh Mẫn  Kăn xiâm hnê ngăn Kuô̆k hô̆i  hiăng trâm  tơpui ƀă Kăn xiâm pơkuâ Ƀơrô dêi khu lâp kong têa a Geneva Tatiana Valovaya.  A rôh  trâm mâ, pôa Trần Thanh Mẫn kăn xiâm hnê ngăn Kuô̆k hô̆i  tối Việt Nam đi đo môi tuăn rơdêi chuh ngiah hên troăng ƀă kô pơtối  veăng pêi ‘no hnoăng kơhnâ hên tâ a mâu tơdroăng  cheăng dêi Khu lâp kong têa.

Việt Nam đang pơtối vâ tơbriêt mot cheăng tung Hô̆i đong Ngăn hnoăng rêh ối mơngế hneăng hơnăm 2026-2028, tâng châ rah xo Việt Nam kố ai hên tơdroăng pêi pro ƀă hriĕn plĕng ki nếo vâ pơtối rak hnoăng cheăng dêi kơ koan mê tung  tung pơla lâp plâi tơnêi oh tá tơniăn ƀă pơloăng mơnúa môi tiah nôkố. Kăn xiâm pơkuâ Tatiana Valovaya mơnê kơ Việt Nam hiăng môi tuăn ƀă mâu tơdroăng pêi tơdjuôm dêi Khu lâp kong têa, tung mê ai tơdroăng djâ troăng a hdrối pêi pro tơdroăng hriĕn plĕng mơđah tơbleăng  um tơmeăm pro dêi  17 ngế vâi kơdrâi kơhnâ rơkê tung tơdroăng tơbleăng mâu Pơkâ mơnhông krá tơniăn. Jâ khê̆n kơdeăn hnoăng cheăng pêi dêi khu kăn Việt Nam a mâu tôh tơrŭm cheăng dêi Khu lâp kong têa xuân môi tiah tung mâu tơdroăng  cheăng tơdjuôm. Péa pâ vâ môi tuăn pơtối mơdêk tơrŭm cheăng pơla Việt Nam - Khu lâp kong têa tung la ngiâ.