VOV4.Xơ Đăng - Kơxo lơ 17/1, pôa Trần Thanh Mẫn, kăn xiâm phŏ hnê ngăn Kuô̆k hô̆i pơkua djâ khu kăn Kuô̆k hô̆i troh chôu nhang, pleăng reăng tơbâ Đăi tươ̆ng Võ Nguyên Giáp prế pôa Lê Duẩn, kăn xiâm pơkuâ hnê ngăn cheăng Đảng hneăng hdrối drêng Têt Lo hơnăm nếo Nhâm Dần 2022. Pôa Trần Thanh Mẫn, kăn xiâm phŏ hnê ngăn Kuô̆k hô̆i rơtế ƀă khu kăn Kuô̆k hô̆i mơhno tối hiâm mơno ki pâ nhuô̆m châ Đăi tươ̆ng Võ Nguyên Giáp – Ngế ngoh rơmúa dêi Khu lêng Kuăn pơlê Việt Nam – ngế ki khên tơnôu dêi hdroâng mơngế Việt Nam; tơbâ troh, pâ mơnê hnoăng cheăng kân kĭn dêi Đăi tươ̆ng hiăng pleăng dêi plâ rơxông ăm tơdroăng cheăng kăch măng khên tơnôu dêi Đảng ƀă hdroâng mơngế Việt Nam.

Ƀă khu lêng kuăn pơlê Việt Nam, Đăi tươ̆ng Võ Nguyên Giáp cho Kăn xiâm pơkuâ ngăn lêng – Ngế ngoh rơmúa dêi Khu lêng kuăn pơlê Việt Nam, hiăng ai hnoăng kân mơjiâng môi khu lêng khên tơnôu, rơdêi, veăng kum pơkâ rơtế ƀă tâi tâng kuăn pơlê plâ ƀlêi trâng péa rôh tơplâ xâ cho Pơhlăng ƀă xâ Mih vâ hdi xo tơnêi têa.

Katarina Nga tơplôu ƀă tơbleăng