VOV4.Xơ Đăng Kơxê lơ 8/2, troh pôu, rơkâu Têt ƀă pêi cheăng a Khu xiâm ngăn hnê hriâm ƀă hnê mơjiâng tuăn ngoâ rơkê, pôa Trần Thanh Mẫn, ngế cheăng tung Khu xiâm pơkuâ tơdroăng kal kí, kăn xiâm phŏ hnê ngăn Kuô̆k hô̆i pơchân tung la ngiâ tơtrŏng tâ nếo hnê hriâm hiâm mơno, túa rêh ối, ivá rơkê plĕng, malối cho hnê ‘na hiâm mơno pâ nhuô̆m tơnêi têa, hâk tơngăm, mơdêk loi nhuô̆m hdroâng kuăn ngo ƀă hên ki ê, pơxiâm ăm tơdroăng ki rơhêng vâ mơnhông tơnêi têa kro mơdrŏng, hơniâp ro.

Tối troh mâu tơdroăng ki tá hâi pêi pro klêi, tung mê ai péa khu tơdroăng ki châ tơmâng ngăn cho hơ’lêh nếo tâi tâng hnê hriâm ƀă rak tơniăn rơkê tung hnê ƀă hriâm tung pơla ai pơreăng COVID-19, pôa Trần Thanh Mẫn pơkâ thế, kơvâ ngăn hnê hriâm ƀă hnê mơjiâng tuăn ngoâ rơkê kal tăng ‘nâi nhên mâu xiâm kối tơdroăng ki ôh tá vâ hmâng, tơngôu, ai troăng hơlâ pơkâ ki hdrối, ki ton xŏn, ki nhên, séa ngăn vâ pơkâ tơleăng.

Tơdrêng amê hlối pơkâ thế, Vi ƀan Mơhno túa lĕm tro – Hnê hriâm ƀă Hnê mơjiâng tuăn ngoâ rơkê kal ai tơdroăng ki tơrŭm đi đo, tơƀrê, vâ teăm pơkâ tơleăng mâu tơdroăng ki trâm sap ing tơdroăng ki ai khât; kal tơrŭm tơtro tơdroăng ki hnê hriâm ƀă hriăn ngăn, tơbleăng xúa mâu tơdroăng ki rơkê plĕng khoa hok ƀă kong ngê̆ nếo; pêi pro hnê hriâm tiô tơdroăng ki rơhêng vâ dêi mâu kong têa kal mâu ngế pêi cheăng.

Katarina Nga tơplôu ƀă tơbleăng