VOV4.Xơ Đăng - A Hngêi Kuô̆k hô̆i, pôa Trần Thanh Mẫn, Kăn xiâm phŏ hnê mơhno má môi Kuô̆k hô̆i hiăng tơdah pôa John Kerry, Kăn teăng mâ dêi Kăn xiâm pơkuâ kong têa Mih ‘na kong prâi hơ’lêh, dế ai roh lăm pôu pêi cheăng a Việt Nam. Pôa Trần Thanh Mẫn tối nhên: cho môi tung mâu kong têa tro tơdjâk râ ó má môi xua kong prâi hơ’lêh, ki má lối cho a kơpong tơbăng kroăng Cửu Long, xua mê, Việt Nam mơnhên hbrâ ví ƀă kong prâi hơ’lêh cho hnoăng cheăng ki xiâm.

Tung la ngiâ, Kuô̆k hô̆i Việt Nam kô pơtối rơtế ƀă Chin phuh mơjiâng ƀă kêi đeăng tiô luât vâ thăm mơnhông mơdêk mâu on tơhrik ki vêh mơjiâng môi tiah on tơhrik kơtâu ƀă khía, on tơhrik kơtâu ƀă mâ hâi; vêh pơ’lêh mâu pơkâ dêi Troăng pêi ton xŏn tơtêk hôm păng ‘nâng; pói vâ Mih thăm tŏng kum Việt Nam ‘na liăn ngân, kŏng ngê̆, hngêi trăng, troăng klông, hnê mơjiâng mơngế pêi cheăng ƀă xo vế túa ki rơkê tơtro pơ’lêh on tơhrik vâ Việt Nam kô chiâng pêi pro tŭm mâu tơkêa a COP26.

A Sa Ly tơplôu ƀă tơbleăng