VOV4.Xơ Đăng - Pơtối lăm pôu ƀă rơkâu Têt Đảng bộ, mâu kăn ƀă kuăn pơlê kong pơlê Quảng Ngãi, kơxê lơ 17/ 1, pôa Võ Văn Thưởng, Kăn pơkuâ hnê mơhno ‘na cheăng Đảng, rơtế ƀă mâu kăn xiâm hiăng troh xah hêi ro ƀă Tơdroăng “Têt tơkŭm dêi rơpó - Rơnó hơngui tơniăn lĕm 2022” ƀă hlối hbru tơmeăm Têt  ăm hrĭng ngế kŏng nhân Kơpong Hngêi kơmăi VSIP Quảng Ngãi, a cheăm  Tịnh Phong, tơring Sơn Tịnh; trâm mâ, rơkâu Têt ăm mâu kăn bô̆, mâu ngế ki pêi cheăng a Kŏng ti Cổ phần Lọc hóa dầu Bình Sơn, Kơpong hngêi kơmăi cheăng kâ Dung Quất.

Tết hơnăm kố, Khu ngăn mơngế pêi cheăng kong pơlê Quảng Ngãi tơbleăng hên tơdroăng cheăng tơmâng troh tơdroăng “Têt tơkŭm dêi rơpó - Rơnó hơngui tơniăn lĕm 2022” ƀă troăng rơhlâ tâi tâng mâu ngế ƀă mâu ngế pêi cheăng xuân ai Têt. Ing mê, Kŏng đoân rêm râ hiăng kum ăm vâ chê 65 rơpâu ngế đoân viên ƀă tâi tâng kơxô̆ liăn lối 19 rơtal liăn; mơhnhôk veăng kum 700 ngế pêi cheăng a hngêi kơmăi, mâu ngế pêi cheăng ‘na tơnăng ká ƀă kơxô̆ liăn 700 rơtuh liăn, diâp ăm  25 toăng hngêi tuăn pâ dêi kŏng đoân pro ƀă tâi tâng kơxô̆ liăn 1 rơtal.

Veăng xah hêi ro tung Tơdroăng “Têt tơkŭm dêi rơpó - Rơnó hơngui tơniăn lĕm  2022”, pôa Võ Văn Thưởng khĕn kơdeăn khât tơdroăng hriăn plĕng dêi khu xiâm pơkuâ ngăn mơngế pêi cheăng Việt Nam tung tơdroăng pơtối rak vế 7 hơnăm pơtối “Têt tơkŭm dêi rơpó ƀă rế ton rế hên, kum ai pơxúa, tơmâng khât tơdroăng rêh ối ăm mơngế pêi cheăng tung rôh Têt.

Gương tơplôu ƀă tơbleăng