VOV4.Xơ Đăng - Hâi lơ 12/1, pôa Võ Văn Thưởng, Kăn cheăng tung Khu xiâm kal kí, Kăn xiâm hnê mơhno má môi tơdroăng cheăng Đảng hiăng lăm pôu, diâp kơxuô tơmeăm Têt Lo hơnăm nếo Nhâm Dần ăm rơpŏng ai troăng hơlâ tŏng kum, mơngế ai hnoăng a kong pơlê Bắc Kạn. A tơring Chợ Đồn, pôa Võ Văn Thưởng hiăng troh lăm pôu kơ-êng, diâp kơxuô tơmeăm ăm pôa Triệu Văn Vấn – kăn ƀô̆ ki apoăng xông tơplâ xâ, hơnăm kố 97 hơnăm, ối a thôn Nà Tẳng, cheăm Lương Bằng ƀă diâp 200 kơxuô tơmeăm ăm mơngế ai hnoăng ƀă kăch măng, rơpŏng ai troăng hơlâ tŏng kum a tơring Chợ Đồn.

Pôa Võ Văn Thưởng, Kăn xiâm hnê mơhno má môi tơdroăng cheăng Đảng lăm pôu, diâp tơmeăm Têt ăm rơpŏng ai troăng hơlâ tŏng kum, mơngế ai hnoăng tơnêi têa a Bắc Kạn

Pêi cheăng ƀă Khu hnê mơhno má môi tơdroăng cheăng Đảng kong pơlê Bắc Kạn, pôa Võ Văn Thưởng kheăn kơdeăn mâu tơdroăng châ tơƀrê Bắc Kạn hiăng châ tơƀrê tung mâu kơvâ cheăng kâ, rêh ối pơlê pơla, kơdroh kơtiê, rak ngăn tơdroăng rêh ối dêi kuăn pơlê xuân môi tiah tơdroăng mơjiâng Đảng tung pơla kố, tơdrêng mê pơkâ thế kong pơlê Bắc Kạn pơtối mơnhông mâu tơmeăm ki ai hlâu, tơmeăm ki kơnâ hiăng ai hlâu tung mơnhông mơdêk cheăng kâ – rêh ối pơlê pơla.

A Sa Ly tơplôu ƀă tơbleăng