Pôa Võ Văn Thưởng, Kăn xiâm hnê ngăn tơnêi têa tối Việt Nam nhoăm Italia tung tơdroăng tơná tơpui. Péa ngế kăn hiăng tơpui ƀă môi tuăn mâu troăng rơhlâ ƀă tơdroăng pêi pro ki kân vâ mơdêk tơrŭm cheăng pơla Việt Nam - Italia. ‘Na tơdroăng kal kí tơpui kâ, péa pâ môi tuăn mơdêk tơpui tơno tơrá mâu râ kăn, malối cho kăn xiâm rêm kơvâ dêi Tơnêi têa, Chin phuh ƀă Kuô̆k hô̆i; pơtối tơbleăng pêi tơƀrê mâu luât pơkâ tơrŭm cheăng pơla péa pâ.

‘Na cheăng kâ, Kăn xiâm pơkluâ kong têa Italia môi tuăn ƀă tơdroăng pâ thế peăng Việt Nam ‘na tơdroăng péa pâ pơtối mơdêk tơbleăng pêi tơƀrê Tơdroăng kĭ Tơhrâ tê mơdró pơla Việt Nam - EU (EVFTA) ; mơdêk tơpui tơno ƀă kuăn pơlê ing tơrŭm hnê hriâm - hnê mơjiâng tuăn ngôa rơkê, túa lěm tro - hơdruê xuăng, ôm hyô, tơrŭm pơla mâu kong pơlê ƀă hên ki ê.