Tung chôu phut nhoăm tơmâng, tơrŭm cheăng ƀă tơpui tono tơdrăng, péa Ngế kăn xiâm hiăng tơbleăng ăm dêi rơpó ‘nâi ‘na tơrêm tơnêi têa dêi tơná, tơpui mâu tơdroăng vâ tơrŭm pêi ƀă mâu troăng rơhlâ mơnhông pê rơdêi, pêi thâ tâ nếo tung tơrŭm cheăng tiah hmâ ƀă tơrŭm hên tơdroăng cheăng pơla Việt Nam ƀă Kong têa Áo.

Pôa Võ Văn Thưởng pơkâ thế péa pâ pơtối tơrŭm krá, xúa pêi tơƀrê mâu tơdroăng ki pơxúa dêi tơdroăng Kĭ tơhrâ Tê mơdró tơniăn xua Việt Nam - EU (EVFTA); tung mê, ai tơdroăng séa ngăn pro tơ’lêi hlâu ăm mâu tơmeăm ki tê ăm kong têa ê dêi tơrêm kong têa châ tê a kong têa dêi rơpó; Áo ai luât pơkâ mơhnhôk, pro hlâu ăm khu mơdró Áo ‘no liăn cheăng a Việt Nam tung mâu tơdroăng ki tơná ai hlâu mê cho kơmăi kơmok kơjo kum mơjiâng pro ô tô, troăng rơxế lơtreng, tơmeăm khăm pơlât, pơkeăng pơlât...

Péa pâ môi tuăn mơdêk pêi mâu tơdroăng tơrŭm hnê hriâm - hnê mơjiâng tuăn ngôa rơkê - túa lĕm tro, ngê̆ thuât, tơ’noăng ivá, mơnhông ‘na tơdroăng trâm tơpui tơno ƀă kuăn pơlê.Klêi hôp, pôa Võ Văn Thưởng ƀă Kăn xiâm pơkuâ kong têa Áo hiăng hlo ƀă mâ leh kĭ tung hlá mơ-éa chôu pâ pơla Ngế xiâm tơpui kâ Việt Nam ƀă Ngế xiâm tơpui kâ Áo.