Hâi lơ 24/7, pôa Võ Văn Thưởng, Kăn xiâm hnê ngăn tơnêi têa ƀă Kơdrâi pôa hiăng lăm pôu Hngêi pêi cheăng pơkuâ tơnêi têa ƀă trâm mâ Kăn pơkuâ pơlê kong kân Vienna. Pôa Võ Văn Thưởng tối phiu ro roh apoăng troh pơlê kong xiâm Vienna, plâi nuih dêi kong têa Áo, tíu xiâm mơhno khôi túa lĕm tro Châu Âu, tíu rak ‘măn, rak vế mâu ki kơnâ khôi túa lĕm tro dêi châu Âu ƀă hên hơnăm pơtối châ rah xo cho pơlê kong kân tơxâng rêh má môi lâp plâi tơnêi.

Kăn pơkuâ pơlê kong kân Vienna tối hâk tơngăm tơdah pôa Võ Văn Thưởng ƀă kơdrâi pôa ƀă Khu râ kăn teăng mâ khu râ kăn xiâm Việt Nam troh lăm pôu pêi cheăng kong têa Áo ƀă pơlê kong xiâm Vienna. Kăn pơkuâ pơlê kong kân Vienna tơbleăng ƀă Kăn xiâm hnê ngăn tơnêi têa pin ‘na tơdroăng cheăng kâ – rêh ối pơlê pơla dêi pơlê kong kân Vienna.

Kăn pơkuâ pơlê kong kân Vienna hiăng vêh tối mâu Hneăng hôp khoa hok ‘na Pôa Hồ Chí Minh, Kăn xiâm hnê ngăn tơnêi têa, tơdroăng tơrŭm cheăng krá tơniăn pơla pơlê kong xiâm Vienna ƀă pơlê kong xiâm Hà Nội, vêh tối mâu roh lăm pôu pêi cheăng kong têa Áo dêi Kăn pơkuâ râ xiâm Việt Nam.

Tung pơla tơrŭm cheăng Việt Nam – Áo dế mơnhông mơdêk lĕm, pơlê kong kân Vienna pói vâ thăm mơdêk tơdjêp tơrŭm ƀă mâu kong pơlê Việt Nam, ki má lối cho tê mơdró, ôm hyô, trâm mâ pơla kuăn pơlê péa tơnêi têa, khôi túa lĕm tro - ngê̆ thuât.