Pôa Võ Văn Thưởng, Kăn xiâm hnê ngăn tơnêi têa tối, luât pơkâ dêi Việt Nam cho nhoăm tơdroăng mơnhông tơrŭm cheăng tiah hmâ sap ton nah ƀă tơrŭm hên tơdroăng cheăng ƀă mâu kong têa Trung Á, tung mê ai kong têa Uzbekistan, púi vâ tơrŭm cheăng pơla Việt Nam -Uzbekistan, mơnhông tơƀrê tâ nếo, ai tiô púi vâ ki pơxúa dêi rêm ngế kuăn pơlê péa tơnêi têa.

Ing mê, tối tơmeăm ki hlâu tơrŭm cheăng, Kăn xiâm hnê ngăn tơnêi têa pơkâ thế péa pâ mơdêk tơrŭm cheăng kâ - tê mơdró ki dế vâ mơnhông tung achê kố, hlối tơrŭm pêi krá  tâ mâu tơmeăm ki ai hlâu  ki ê mê cho hnê hriâm, hnê mơjiâng tuăn ngôa rơkê, mơhno túa lĕm tro, ôm hyô, trâm tơpui ƀă kuăn pơlê, hriăn plĕng po troăng kơneăng tơdjêp ƀă mâu troh vâ troh dêi péa tơnêi têa.

Pôa Võ Văn Thưởng, Kăn xiâm hnê ngăn tơnêi têa  pơkâ thế péa pâ mơdêk tơpui kâ tơrá mâu kăn rêm râ, malối cho kăn xiâm, vâ mơdêk loi nhoăm tơdroăng kal kí ƀă hlê dêi rơpó, po rơdâ tơrŭm cheăng pơla péa pâ ki péa pâ ai hlâu vâ tơ’nôm ăm dêi rơpó.