Kăn xiâm hnê ngăn tơnêi têa hiăng troh pôu tơpui tơno ƀă kăn ƀô̆, mâu ngế cheăng teăng mâ Việt Nam, kuăn pơlê ki rêh ối cheăng kâ ƀă hriâm tâp a Italia. Nôkố ai dâng 5 rơpâu ngế Việt Nam rêh ối a Italia, ai tíu ối tro luât tơniăn, đi đo tơrŭm ƀă châ tơnêi têa a kố mơnhên tối khât. Kăn xiâm hnê ngăn tơnêi têa xuân rơhêng vâ kuăn pơlê Việt Nam ki rêh ối cheăng kâ a Italia rak vế khôi túa lĕm tro khôi hmâ dêi mơngế Việt Nam.

Pơtối mơdêk khôi hmâ tơrŭm, tŏng kum dêi rơpó tung tơdroăng rêh ối, pêi pro tro luât kong têa pú dế ối nôkố. Mơnhên tối mâu khu ki rơkê plĕng, khu ki hriăn ‘na khoa hok, khu mơdró kâ, khu tơrŭm kong têa ê hiăng mơdoh hâi khế hriăn ngăn, mơđah tơbleăng khôi túa lĕm tro Việt Nam, Kăn xiâm hnê ngăn tơnêi têa tối tiah kố, mê cho tơdroăng ki kal loi nhuô̆m.

Teăng mâ Đảng, Tơnêi têa, pôa Võ Văn Thưởng, Kăn xiâm hnê ngăn tơnêi têa mơnê mâu vâi pú Italia ki tơrŭm hmâ ƀă Việt Nam hiăng tơmâng tŏng kum Việt Nam tung plâ mâu hơnăm hdrối.