A chôu phut trâm mâ mê, pôa Võ Văn Thưởng tối nhên, Đảng ƀă Tơnêi têa Việt Nam đi đo tŏng kum ngăn khât, pro tơ’lêi hlâu ăm mâu tơdroăng khôp châ pêi dêi hnoăng cheăng, châ mơnhông tro tiô tơdroăng pơkâ ƀă Luât; tung mê, ai tá Luât loi tĭng - tiô khôp ƀă pơtối pêi pro tơtro má môi ‘na luât pơkâ vâ kô tơ’lêi ăm tơdroăng loi tĭng - tiô khôp dêi kuăn pơlê ƀă mâu khu pơkuâ ngăn tơdroăng khôp. Pôa Võ Văn Thưởng mơhno tối, pó rơhêng vâ Ƀok Kadinal Pietro Parolin, xuân cho Di ki Pro xiâm hnê ngăn Hngêi khôp xiâm Vatican pơtối tŏng kum troh tơdroăng cheăng dêi tơdroăng khôp Pâ Xeăng a Việt Nam.

Ƀok Kadinal Parolin hiăng kơdĕn khĕn mâu hnoăng pêi pro ki kêi tơniăn lĕm dêi Việt Nam tung rak vế ngăn, kum tơ’lêi hlâu ăm tơdroăng tiô khôp, tung mê ai tơdroăng tiô khôp Pâ Xeăng. Ƀok Kadinal Parolin mơnê, mơnhên tối tơdroăng ki kơdo mơ-eăm, pêi pro kơhnâ, rơkê dêi Việt Nam ‘na mâu tơdroăng ki veăng pêi pro, kum cheăng dêi Khu pơkuâ ngăn Khôp Pâ Xeăng Việt Nam, ki malối ‘na kơvâ ki ai tuăn hơ-ui kum, lăm tơveăng ‘na tuăn mơno ƀă kế tơmeăm, hnê hriâm, ‘na  pơkeăng ƀă khăm pơlât, hnê tơdroăng cheăng pêi. Ƀok Kadinal ki rak ngăn Hngêi khôp xiâm Vatican hâk kơdĕn hnoăng cheăng ki rơkê pơxúa dêi Khu xiâm ngăn na tơrŭm cheăng Việt Nam - Vatican tung tơdroăng ki hlê plĕng ƀă loi tơngah dêi pó.