VOV4.Xơ Đăng - Kơxo lơ 19/1, a tíu pêi cheăng Tíu xiâm Đảng, Khu hnê mơhno cheăng Tơnêi têa Mơgêi Tơdroăng pơkâ 26 tơkŭm po Rôh hôp lâp tơnêi têa Veăng tơpui tối ‘na hlá mơ-éa tối tơbleăng mơgêi pêi pro tơdroăng pơkâ mâu kăn tối môi tuăn ƀă tơdroăng ki mơnhên tối dêi kơxop hlá mơ-éa tối tơbleăng ‘na mâu tơdroăng pêi pro kân kĭn klêi lối 13 hơnăm pêi pro tơdroăng pơkâ hiăng tơdjâk kân troh kơpong pêi chiâk deăng, thôn pơlê pêi chiâk deăng, kuăn pơlê pêi chiâk deăng ƀă troh tơdroăng cheăng ka rêh ối pơlê pơla tơnêi têa.

Tiah mê, ki rơdêi ‘na mơdêk pêi chiâk deăng châ a kơlo ki chía hên 2,94%. Kơxô̆ liăn pêi lo ing tê kế tơmeăm pêi lo ing chiâk deăng, loăng pơlái, ká xi xŏng tâk 8,17% tung hơnăm. Tơdroăng pơkâ dêi tơnêi têa ‘na mơjiâng thôn pơlê nếo hiăng plah hdrối môi hơnăm tơdế ƀă hên ki ê. Ing rôh tơpui tơno, ai mâu rơkong tơpui tối ‘na kơpong pêi chiâk deăng, kuăn pơlê pêi chiâk deăng, thôn pơlê tơnêi têa pin ối mơhno tối hên tơdroăng ki tá hâi pêi pro klêi, môi tiah ki kơnía mơdêk dêi kơvâ pêi chiâk deăng ối hrá, tá hâi krá tơniăn.

Tơdroăng ki mơjiâng thôn pơlê nếo ối trâm hên xơpá, ôh tá tơniăn. Pêi lo liăn a thôn pơlê ối iâ, ôh tá tơdâng tơ’mô ƀă mâu kơpong, pơla thôn pơlê ƀă kơphô̆ ối hên.

Katarina Nga tơplôu ƀă tơbleăng