VOV4.Xơ Đăng - Kơxo lơ 21/1, pôa Vũ Đức Đam, Ngế pro xiâm phŏ hnê ngăn tơnêi têa rơtế khu râ kăn pêi cheăng hiăng troh lăm pôu, mơhnhôk ƀă diâp kơxuô tơmeăm ăm đoân viên, mơngế pêi cheăng ai tơdroăng rêh ối pá puât, mơngế tro tâ pơreăng ôh tá ai pơkeăng pơlât prêi, mơngế hên hơnăm ôh tá ai liăn vêh pơlê xiâm kâ Têt, ngế tro tơdjâk xua pơreăng COVID-19 a kong pơlê Thừa Thiên Huế, klăng roh Têt Lo hơnăm nếo Nhâm Dần. Pôa Vũ Đức Đam, Ngế pro xiâm phŏ hnê ngăn Chin phuh ƀă kăn teăng mâ Tổng Liên đoân pêi cheăng Việt Nam hiăng diâp 200 kơxuô tơmeăm, rêm kơxuô kơnâ 1 rơtuh 250 rơpâu liăn, ai 1 kơtong tơmeăm kơnâ 250 rơpâu liăn ƀă 1 rơtuh liăn a ngâ.

Xuân tung kơxo lơ 21/1, pôa Vũ Đức Đam hiăng troh lăm pôu mâu ngế châi tamo dế pơlât a hngêi pơkeăng pơlât mâu ngế châi xôu kong pơlê Thừa Thiên Huế a bêng Hương Sơ, pơlê kong kơdrâm Huế. Akố, Ngế pro xiâm phŏ hnê ngăn tơnêi têa hiăng rơkâu Têt ƀă veăng kum kơdroh mâu tơdroăng pá puât tung pơla kố nah ƀă khu thái pơkeăng, ƀok thái pơkeăng ƀă mâu ngế châi tamo; tơdrêng amê pói vâ mâu thái pơkeăng, ƀok thái pơkeăng pơtối mơ-eăm tung tơdroăng pơlât.

A Sa Ly tơplôu ƀă tơbleăng