VOV4.Xơ Đăng Kơxê lơ 8/2, pôa Vũ Đức Đam, Ngế pro xiâm phŏ hnê ngăn tơnêi têa, Kăn xiâm phŏ Khu hnê mơhno Tơnêi têa ‘na hbrâ mơdât pơreăng COVID-19 pơkuâ roh hôp ƀă Khu râ kăn pơkuâ Khu xiâm pơkuâ ngăn pơkeăng ƀă khăm pơlât, mâu ngế rơkê ƀok thái pơkeăng, khu râ kăn pơkuâ mâu kong pơlê ‘na hbrâ mơdât châ hlo F0 tung hngêi trung hriâm. Pơtối mê, mâu ngế rơkê pơrá mơnhên pơkâ xiâm hbrâ mơdât pơreăng châ tơƀrê tiô troăng kâng kơxái mơdât pơreăng kơpong kŭn tâng châ hlo F0 tung lâm hriâm, tơniăn hngêi trung xuân pơtối lôu péa hriâm tơniăn.

A roh hôp mâu ngế rơkê xuân tối, mơhé hiăng pâk vaccine, laga hbrâ mơdât pơreăng tối tơdjuôm xuân thế hbrâ mâu tơdroăng ki ‘mêi, ƀă tơdroăng mơni kô ai pơreăng ki pro chiâng tơ-ê ki nếo dêi virus kô tâ tú rĕng tâ. Drêng 20 rơtuh ngế hok tro rơtế troh hngêi trung mê thế hbrâ hdrối tơdroăng ki kơxô̆ vâi hdrêng tro tâ COVID-19 tâk hên.

Pôa Vũ Đức Đam mơnhên, roh tơplâ mơdât pơreăng COVID-19 châ pơkâ rak vế ivá dêi kuăn pơlê cho má môi, ki rơhêng vâ tối tung mê cho rak vế ivá vâi hdrêng. Pôa Vũ Đức Đam xuân pơkâ thế Khu xiâm pơkuâ ngăn pơkeăng ƀă khăm pơlât mơdât ƀă ai troăng hnê mơhno pơlât krê ăm vâi hdrêng tro tâ COVID-19, tơdrêng amê hnê mơhno thăm gak ngăn Khoa nhi a mâu hngêi pơkeăng tung lâp tơnêi têa.

A Sa Ly tơplôu ƀă tơbleăng