VOV4.Xơ Đăng - Kơxo lơ 24/3, a Hà Nội, pôa Vũ Đức Đam, Ngế pro xiâm phŏ hnê ngăn tơnêi têa veăng ƀă xông tơpui a Hneăng hôp tâi tâng Viƀan Tơnêi têa ‘na droh rơtăm Việt Nam roh má môi. Xông tơpui a hneăng hôp, pôa Vũ Đức Đam tối rơdêi: Nôkố, droh rơtăm tá hâi châ tŭm 18 hơnăm hiăng hlê plĕng pơlê pơla, ‘na hên kơvâ rơkê tâ rơxông nôu pâ. Kố cho môi tung mâu pơloăng mơnúa pơkâ ăm Vi ƀan Tơnêi têa ‘na droh rơtăm Việt Nam.

Pôa Vũ Đức Đam, Ngế pro xiâm phŏ hnê ngăn tơnêi têa a hneăng hôp

Pôa Vũ Đức Đam pơkâ thế, tung la ngiâ Vi ƀan ƀă Khu xiâm pơkuâ Đoân droh rơtăm kal hlê plĕng nhên, mơjiâng mâu tơdroăng pêi vâ mơnhông mâu tơdroăng tơmiât pêi rơkê dêi droh rơtăm Việt Nam rơxông nếo. Tối nhên tơdroăng tơmâng tŏng kum dêi Chin phuh ƀă Ngế pro xiâm hnê ngăn Chin phuh ƀă Droh rơtăm Việt Nam ƀă tơdroăng pêi cheăng droh rơtăm, pôa Vũ Đức Đam pơkâ mâu Khu xiâm, kơvâ cheăng ki tơdjâk kal tơrŭm krá tơniăn ƀă Vi ƀan Tơnêi têa ‘na droh rơtăm Việt Nam ƀă Khu xiâm Đoân droh rơtăm pêi pro mâu tơdroăng ki nhên, tiô tro tơdroăng dêi Chin phuh.

A Sa Ly tơplôu ƀă tơbleăng