VOV4.Xơ Đăng - Kơxo lơ 21/9, a tíu pêi cheăng Chin phuh, pôa Vũ Đức Đam, Ngế pro xiâm phŏ hnê ngăn tơnêi têa pêi cheăng ƀă Ngế xiâm ngăn pơkeăng pơlât, mâu khu pêi cheăng, khu mơdró tung tơnêi têa, kong têa ê ‘na tơdroăng cheăng mơnhông cheăng kơmăi kơmok pro pơkeăng tung tơnêi têa. Mâu kăn pơkâ thế “Chin phuh rĕng pơtroh ‘mâi hơ’lêh luât pro pơkeăng tro tiô pơkâ pêi rĕng tung hơnăm 2023 kô tơleăng mơnhên klêi tơdroăng xơpá ‘na ki dế ôh tá bê pơkeăng, rak ngăn yă pơkeăng”.

Tiô tối tơbleăng dêi Khu xiâm rak ngăn pơkeăng, ki tâk hên tâng riân dêi kơvâ cheăng kơmăi kơmok pro pơkeăng nôkố dâng 10-12%. Pro pơkeăng tung tơnêi têa châ 46% tung tâi tâng hnoăng pro dêi pơkeăng pơlât. Hngêi kơmăi hâi tơmâng khât tơdroăng tí tăng pro pơkeăng xúa kơmăi ki dâi lĕm, hâi hriăn pro pơkeăng nếo, ‘na pơkeăng ki vâ pơlât mâu tơdroăng châi...

Pơ’lêh nếo tí tăng pro pơkeăng

Tiô mâu kăn tối, tung mâu hơnăm hdrối, luât pơkâ rak ngăn yă pơkeăng, troăng rơhlâ xúa pơkeăng hiăng kơdroh tơdroăng pơcháu cheăng pro pơkeăng ƀă kơmăi kơmok pro pơkeăng ki nếo. Tơdroăng ‘no liăn tí tăng’nâi plĕng ƀă mơnhông mơdêk hâi hlo tơƀrê. Mâu kăn tối pâ thế mâu tơdroăng cheăng ƀă kơmăi pro pơkeăng thế tơkŭm tơmâng tơ’mot hên khu ‘no liăn cheăng ƀă kơmăi kơmok pro pơkeăng ƀă mơdêk pro hên pro lĕm, mơjiâng mâu tíu xiâm tí tăng ‘nâi plĕng pro vaccine, mơdêk xiâm pro pơkeăng tung tơnêi têa; mơdêk ivá tí tăng ‘nâi plĕng,  séa ngăn pơkeăng drêng hiăng klêi pro.

Gương tơplôu ƀă tơbleăng