VOV4.Xơ Đăng - Kơxo lơ 9/2, pôa Vương Đình Huệ, Kăn xiâm hnê ngăn Kuô̆k hô̆i hiăng troh chôu nhang koh tơbâ troh mâu jâ pôa, mâu ngế xiâm ai hnoăng mơjiâng tơnêi têa a Điện Kinh Thiên, kơpong tíu tơbâ Hoàng Thành Thăng Long, pơlê kong xiâm Hà Nội. Tung  chôu phut tĭng a Hoàng Thành Thăng Long, pôa Vương Đình Huệ, Kăn xiâm hnê ngăn Kuô̆k hô̆i rơtế ƀă mâu kăn hiăng troh chôu nháng tơbâ; rơkâu pâ kơ mâu ngế xiâm ki hnoăng mơjiâng tơnêi têa ‘na mâu hnoăng mơnhông tơnêi têa; rơkâu pâ tơnêi têa tơniăn kuăn pơlê hơniâp lĕm; púi vâ mơ-eăm pơtối rak vế ki lĕm dêi rơpâu hơnăm  ki tro rơkê plĕng, mâu tơmeăm kơnía git dêi hdroâng kuăn ngo; tơbâ tơdroăng púi vâ mơnhông mơdêk tơnêi têa xông tơ-brê, hơniâp ro.

Pơtối rak vế ki mơ-eăm ƀă ki rơdêi tơrŭm môi tuăn dêi hdroâng mơngế, Mơdêk pơ’lêh nếo, cheăng ƀă kơmăi kơmok, tiô túa nếo nôkố dêi tơnêi têa. Tơpui tơno ƀă mâu kăn ƀô̆, mâu ngế pêi cheăng a kơpong tíu tơbâ Hoàng thành Thăng Long, pôa Vương Đình Huệ púi vâ, kăn ƀô̆, mâu ngế pêi cheăng tíu tơbâ mơ-eăm rak vế ki kơnía git dêi Hoàng thành Thăng Long, mơ-eăm hnê tối mâu tơdroăng ki kơnía ton nah tíu tơbâ, veăng mơjiâng pơlê xiâm ƀă tơnêi têa tơxâng ƀă mâu pôa mâu ngoh ki hdrối.

Gương tơplôu ƀă tơbleăng