VOV4.Xơ Đăng - Klăng roh 67 hơnăm hâi Ƀok thái pơkeăng Việt Nam lơ 27/2, kơxê lơ 25/2, pôa Vương Đình Huệ, Kăn xiâm hnê ngăn Kuô̆k hô̆i hiăng lăm pôu pêi cheăng Hngêi pơkeăng Hữu nghị Việt Đức. Xông tơpui akố, pôa Vương Đình Huệ kheăn kơdeăn mâu tơdroăng châ tơƀrê trâu hơngế, tơdroăng châ tơƀrê kân dêi khu ƀok thái pơkeăng ƀă mâu ngế pêi cheăng tung kơvâ khăm pơlât tối tơdjuôm, Hngêi pơkeăng Việt Đức tối krê hiăng châ tơƀrê tung pơla kố nah.

Tiô pôa Vương Đình Huệ ing mâu roh pơreăng COVID-19, hiăng ăm hlo nhên ki kal dêi kơmăi kơmok khăm pơlât ƀă khi ƀok thái pơkeăng tung rêm roh lăm khăm pơlât ƀă tơdroăng hbrâ mơdât pơreăng. Pôa Vương Đình Huệ pói tơngah, ƀă khôi túa ƀlêi trâng ing mâu rơxông ƀok thái pơkeăng, Hngêi pơkeăng Hữu nghị Việt Đức ƀă tơdroăng châ tơƀrê má môi tung tơdroăng khăm pơlât ƀă hriăn plĕng khoa hok kô cho xiâm kối vâ thăm tơ’nôm ivá, kum kơvâ khăm pơlât ó rơdêi tâ nếo, kơtăng tâ mê nếo, vâ tơplâ mơdât pơreăng kân COVID-9 ƀă rak ngăn ivá kuăn pơlê.

A Sa Ly tơplôu ƀă tơbleăng