VOV4.Xơ Đăng - Kơxo lơ 26/1, a Hà Nội, pôa Vương Đình Huệ, Kăn xiâm hnê ngăn Kuô̆k hô̆i lăm pôu, pêi cheăng, rơkâu têt ăm khu xiâm pơkuâ ngăn lêng pơlê kong xiâm Hà Nội. Pôa Vương Đình Huệ tối tiah kố, ƀă tơdroăng hmâ pêi pro lối 75 hơnăm mơjiâng, tơplâ ƀă xông tơ-ƀrê, pơtối rak vế tơdroăng cheăng dêi pơlê kong xiâm rơpâu hơnăm mâu tơdroăng ki lĕm tro hmâ pêi pro sap ing nah dêi hdroâng mơngế, pơlê kong kân khên tơnôu; ƀă tơdroăng hmâ pêi pro “Tơplâ hlâ rêh vâ kring vế tơnêi têa”, Khu lêng tơplâ pơlê kong xiâm Hà Nội hiăng đi đo tơmâng pêi pro khât tơ-ƀrê troăng rơhlâ cheăng mâu lêng, mâu lêng kring gak tơkăng kong dêi Đảng, kăn xiâm pơkuâ hnê ngăn lêng  xiâm tơnêi têa, Khu xiâm pơkuâ ngăn lêng tơkăng kong ƀă khu kăn Đảng pơlê kong kân Hà Nội tung mơjiâng tơdroăng kring gak tâi tâng kuăn pơlê, hbrâ tơplâ kring tơniăn kuăn pơlê rế rơdêi.

Hơnăm 2022, pôa Vương Đình Huệ pơkâ thế, Đảng ƀô̆, Khu xiâm pơkuâ ngăn lêng pơlê Kong xiâm kal tơkŭm mâu kăn hnê mơhno, tơkŭm pêi tơdroăng cheăng hnê pêi tơ-brê tơdroăng pơkâ hneăng hôp má 13 dêi Đảng, ki khât cho mâu lêng ki xiâm ki lăm plâ, hbrâ tơplâ dêi mâu lêng tơplâ pơlê kong xiâm. Mơjiâng mâu kơ koan tíu pêi cheăng krá rơdêi, tơ-ƀrê.

Gương tơplôu ƀă tơbleăng