VOV4.Xơ Đăng - Kơxo lơ 10/10, a Hngêi Kuô̆k hô̆i ing pơkuâ dêi pôa Vương Đình Huệ, Kăn xiâm hnê ngăn Kuô̆k hô̆i, Roh hôp má 16 dêi Vi ƀan pơkuâ Kuô̆k hô̆i hiăng pơxiâm po. Tơkŭm po tung 3 hâi, a roh hôp kố, Vi ƀan pơkuâ Kuô̆k hô̆i tơpui ‘na mâu tơdroăng xiâm ki kal vâ tơbleăng Kuô̆k hô̆i a Hneăng hôp má 4, Kuô̆k hô̆i hneăng má 15, tiô tối hdrối pơxiâm po hâi lơ 20/10 la ngiâ kố ah.

Pôa Vương Đình Huệ, Kăn xiâm hnê ngăn Kuô̆k hô̆i pơkuâ roh hôp má 16 dêi Vi ƀan pơkuâ Kuô̆k hô̆i

Pơxiâm po roh hôp, pôa Vương Đình Huệ tối nhên môi tơdroăng xiâm ki kal a roh hôp kố, Vi ƀan pơkuâ Kuô̆k hô̆i kô tơpui tung mâu tơbleăng dêi Chin phuh ‘na cheăng kâ – rêh ối pơlê pơla ƀă liăn ngân tơnêi têa. Drêng ai tơdroăng ôh tá tơniăn tung cheăng kâ lâp plâi tơnêi, ƀă tung tơnêi têa, pakĭng mâu roh tơ’lêi, xuân ai hên mâu tơdroăng tá hâi tro, pá puât ƀă pơloăng mơnúa, xua mê, kal mơnhên nhên xiâm kối, xo vế túa ki rơkê tơtro, ki rơhêng vâ tối troăng tơmiât pêi mâu pơkâ xiâm, troăng pêi ăm hơnăm 2023, tơtrŏng Vi ƀan pơkuâ Kuô̆k hô̆i hlê plĕng pêi pro tiô tơdroăng Hneăng hôp Tơnêi têa 6, ngăn tiô tung tơdroăng pêi pro pơ’lêh liăn khế, liăn khế mơhá ăm mơngế hiăng pơtê cheăng xua hơnăm hiăng krâ, tŏng kum Ƀaoh hiêm pơlê pơla ƀă kơjo mơngế ai hnoăng tung hơnăm 2023 vâ séa ngăn, pơkâ.

            VOV Tây Nguyên/Tơplôu: A Sa Ly