VOV4.Xơ Đăng - Pôu ƀă rơkâu Têt kăn ƀô̆, kông chưk, viên chưk mâu ngế pêi cheăng Khu xiâm ngăn cheăng kơmăi kơmok ƀă tê mơdró drêng hơnăm nếo Nhâm Dần, pôa Vương Đình Huệ, kăn xiâm hnê ngăn Kuô̆k hô̆i pơkâ thế Khu xiâm ngăn cheăng kơmăi kơmok ƀă tê mơdró kal ngăn nhuô̆m hnoăng cheăng mơjiâng Đảng ƀô̆ athế krúa khât, athế krá rơdêi, mơdêk hiâm mơno tơrŭm, ‘mâi mơnhông mâu tơdroăng ki xơpá, pơkâ tơleăng klêi mâu tơdroăng ki tá hâi tơleăng klêi vâ pơxiâm mot tung môi hneăng ki nếo; mơdêk tâ nếo hnoăng cheăng pêi pro kơdĭng, hbrâ mơdât mơhrê liăn ngân tê kơtê.

Tối tiah kố, hơnăm 2022 xuân cho hơnăm ki pơtối ai mâu tơdroăng ki pơloăng mơnúa, xơpá, pôa Vương Đình Huệ, kăn xiâm hnê ngăn Kuô̆k hô̆i pơkâ thế, kơvâ ngăn cheăng kơmăi kơmok ƀă tê mơdró kal tơkŭm rĕng tơbleăng mâu tơdroăng, túa pơkâ, tơdroăng tơkêa va mơdêk tâ nếo hnoăng cheăng hbrâ mơdât pơreăng, tiô troăng ki hmâ tơniăn, rơkê ƀă hbrâ mơdât tơƀrê pơreăng tiô pơkâ dêi Kuô̆k hô̆i, pêi pro ƀlêi chiâng mâu tơdroăng ki pơkâ mơ’no.

Katarina Nga tơplôu ƀă tơbleăng