VOV4.Xơ Đăng - Klăng roh pôa Álvaro Elizarde châ rah xo to pro Kăn xiâm hnê ngăn Kuô̆k hô̆i râ má môi ƀă pôa Raul Soto Mardones châ rah xo to pro Kăn xiâm hnê ngăn Kuô̆k hô̆i râ má péa kong têa Kŏng hoa Chile, teăng mâ Kuô̆k hô̆i kong têa Kŏng hoa chuh ngiah Việt Nam, pôa Vương Đình Huệ hiăng pơtroh kơthô rơkâu. Tung kơthô pôa Álvaro Elizarde, Kăn xiâm hnê ngăn Kuô̆k hô̆i râ má môi Kŏng hoa Chile ƀă pôa Raul Soto Moardones, Kăn xiâm hnê ngăn Kuô̆k hô̆i râ má péa Kŏng hoa Chile, pôa Vương Đình Huệ tối phiu ro hlo tơrŭm cheăng tŭm têk pơla Việt Nam ƀă Chile dế mơnhông mơdêk lĕm tro; péa tơnêi têa nếo tơkŭm po leh tơbâ 50 hơnăm mơjiâng tơrŭm tơpui kâ.

Tung la ngiâ, pôa Vương Đình Huệ pói vâ, tơrŭm krá tơniăn ƀă Kuô̆k hô̆i râ má môi Chile vâ thăm tơrŭm cheăng pơla Tơnêi têa, Kuô̆k hô̆i ƀă kuăn pơlê Việt Nam – Chile rế hía rế tơrŭm trâu hơngế, tơxâng, châ tơƀrê, xua pơxúa tơxâng dêi kuăn pơlê péa tơnêi têa, xua hơniâp lĕm, tơniăn, tơrŭm, mơnhông mơdêk a kơpong ƀă lâp plâi tơnêi.

A Sa Ly tơplôu ƀă tơbleăng