VOV4.Xơ Đăng - A Hngêi Kuô̆k hô̆i, Kăn xiâm hnê ngăn Kuô̆k hô̆i tơdah pôa Dato Sri Ismail Sabri Bin Yaakob, Ngế pro xiâm hnê ngăn kong têa Malaysia koh trâm mâ tơpui tơno klăng roh lăm pôu pêi cheăng Việt Nam. A roh tơdah, pôa Vương Đình Huệ, Kăn xiâm hnê ngăn Kuô̆k hô̆i phiu ro kohƀă kheăn kơdeăn mâu tơdroăng ki kơnía roh lăm pôu pêi cheăng apoăng dêi Ngế pro xiâm hnê ngăn kong têa Malaysia troh a Việt Nam kum thăm mơnhông mơdêk ƀă pro trâu hơngế tâ tơrŭm cheăng ton xŏn Việt Nam.

Kăn xiâm hnê ngăn Kuô̆k hô̆i kheăn kơdeăn mâu tơdroăng châ tơƀrê tơpui tơno păng ‘nâng, châ tơƀrê pơla 2 Ngế pro xiâm hnê ngăn tơnêi têa, xuân môi tiah tơdroăng péa tơnêi têa hiăng châ tơƀrê mâu tơdroăng môi tuăn nếo, tung mê ai môi tuăn ‘na tơrŭm pêi cheăng ƀă tơrŭm tiô luât; pơkâ thế Chin phuh péa tơnêi têa pêi pro rĕng mâu troăng tơrŭm cheăng vâ rơtế rĕng pro tơniăn ƀă mơnhông cheăng kâ – rêh ối pơlê pơla; pói vâ Chin phuh Malaysia pơtối pro tơ’lêi hlâu ăm mơngế pêi cheăng Việt Nam Malaysia.

Pôa Vương Đình Huệ mơnhên, Kuô̆k hô̆i Việt Nam nhuô̆m ƀă thăm veăng kum tung tơdroăng mơnhông mơdêk ó rơdêi tâ tung tơrŭm cheăng ton xŏn ƀă kong têa Malaysia; pơkâ thế Kuô̆k hô̆i péa tơnêi têa tơpui tơno, la ngiâ kĭ môi tuăn tơrŭm cheăng, tơdrêng amê, thăm tơpui tơno khu râ kăn pơkuâ ƀă trâm mâ pơla khu râ kăn Kuô̆k hô̆i vâ tơpui ‘na túa ki rơkê tơtro ‘na mơjiâng luât, thăm hlê plĕng, loi tơngah dêi pó.

A Sa Ly tơplôu ƀă tơbleăng