VOV4.Xơ Đăng - Klăng rơnó Hơngui Nhâm Dần, kơxê măng lơ 21/1, Vi ƀan pơkuâ Kuô̆k hô̆i tơkŭm po trâm mâ mâu kăn pơkuâ Kuô̆k hô̆i, Kăn cheăng tung Vi ƀan pơkuâ Kuô̆k hô̆i mâu hneăng. Tung tơdroăng hơtô dêi roh trâm mâ, pôa Vương Đình Huệ, Kăn xiâm hnê ngăn Kuô̆k hô̆i mơnê tơdroăng tơmâng, mơhnhôk, veăng tơpui hnê tối dêi Kăn pơkuâ Kuô̆k hô̆i, Kăn cheăng tung Vi ƀan hnê mơhno má môi Kuô̆k hô̆i mâu hneăng ăm mâu Kăn teăng mâ Kuô̆k hô̆i hneăng má 15.

Pôa Vương Đình Huệ, Kăn xiâm hnê ngăn Kuô̆k hô̆i trâm mâ khu râ kăn pơkuâ Kuô̆k hô̆i

Pôa Vương Đình Huệ tơbleăng tối tơdroăng châ tơƀrê dêi hơnăm apoăng, hneăng Kuô̆k hô̆i hneăng má 15. Kuô̆k hô̆i hneăng má 15 hiăng đi đo hbrâ, pôu râng hnoăng cheăng, thâ, mơnhông mơdêk tơdroăng rŭm môi tuăn, tuăn ngôa rơkê, tiô tơdroăng rêh ối, teăm tơdrêng tối mâu tơdroăng rêh ối cheăng kâ – rêh ối pơlê pơla tung hneăng hôp vâ séa ngăn, pơkâ teăm tơdrêng. Tơdrêng amê pêi pro hên kơxô̆ tơdroăng cheăng kân tá tơdroăng mơjiâng luât, séa ngăn ƀă pơkâ mâu tơdroăng ki kal dêi tơnêi têa.

A Sa Ly tơplôu ƀă tơbleăng