VOV4.Xơ Đăng - A Hngêi Kuô̆k hô̆i, pôa Vương Đình Huệ, kăn xiâm hnê ngăn Kuô̆k hô̆i trâm mâ ngế kơdrâi cheăng tung Kuô̆k hô̆i a Tơnêi têa ƀă kăn kơdrâi pơkuâ, rak ngăn râ cheăng dêi Ƀơrô cheăng Kuô̆k hô̆i drêng hâi vâi kơdrâi lâp plâi tơnêi lơ 8/3. Pôa Vương Đình Huệ phiu ro, mơnhên tối khât mâu ivá mơ-eăm ôh tá la lâi pơtê dêi rêm ngế kăn cho vai kơdrâi ki cheăng tung Kuô̆k hô̆i, tung mê ai mâu kăn kơdrâi pêi cheăng pơkuâ dêi hneăng hơnăm Kuô̆k hô̆i hneăng má 15.

Ƀă Kuô̆k hô̆i, mâu hneăng cheăng hdrối kố nah, Kuô̆k hô̆i Việt Nam đi đo ai kơxô̆ vâi kơdrâi hên tâng pơchông ƀă mâu kong têa tung kơpong ƀă tung lâp plâi tơnêi; rơkê plĕng ƀă hnoăng cheăng dêi mâu vâi kơdrâi cheăng tung Kuô̆k hô̆i rế hía rế châ mơdêk. Hlo mâu tơdroăng pơkâ thế hnoăng cheăng dêi tơnêi têa tung hneăng hơnăm mơnhông nếo, pôa Vương Đình Huệ pơkâ thế: Mâu vâi kơdrâi ki cheăng tung Kuô̆k hô̆i pêi cheăng a Tơnêi têa ƀă vâi kơdrâi ki pơkuâ, rak ngăn râ cheăng dêi Ƀơrô cheăng Kuô̆k hô̆i pơtối hriâm tâp, mơdêk ki rơkê, veăng kum hên tâ nếo ivá, tơƀrê tơdroăng cheăng dêi Kuô̆k hô̆i; veăng pêi tơƀrê tung túa pơkâ troăng hơlâ tung kơvâ rak tơniăn hnoăng pơxúa dêi vâi kơdrâi ƀă vâi hdrêng, pêi pro tơdroăng pơkâ tơdâng tơ’mô pơla kơnốu ƀă kơdrâi, pêi klêi hnoăng cheăng dêi Ngế kăn kuăn pơlê, tơxâng ƀă tơdroăng loi tơngah, pôk dêi kuăn pơlê tung lâp tơnêi têa.

Katarina Nga tơplôu ƀă tơbleăng