VOV4.Xơ Đăng - Kơxê lơ 27/1, a Hngêi Kuô̆k hô̆i, pôa Vương Đình Huệ, Kăn xiâm hnê ngăn Kuô̆k hô̆i trâm mâ, rơkâu Têt khu râ kăn pơkuâ Kuô̆k hô̆i, kăn teăng mâ Kuô̆k hô̆i pơkuâ môi tơdroăng cheăng a Tơnêi têa, kăn ƀô̆, kŏng chưk, viên chưk, mơngế pêi cheăng dêi Ƀơrô Kuô̆k hô̆i: veăng leh kheăn kơdeăn ôh tá tối ƀă khu pú hên, ngế krê rơkê tung pêi hnoăng cheăng tơbleăng, ăm Hneăng hôp ôh tá tối hdrối roh má môi, Kuô̆k hô̆i hneăng má XV.

Xông tơpui a roh leh, pôa Vương Đình Huệ tối nhên, tơnêi têa pin hiăng tơkâ hluâ hơnăm 2021 ƀă hên tơdroăng cheăng tơbrêi tơbrêh, hên tơdroăng tô tuăn, pơloăng mơnúa. Ki phá tơ-ê dêi Kuô̆k hô̆i cho pêi cheăng khu pú hên. Mâu hneăng hôp dêi Kuô̆k hô̆i, mâu roh hôp tiô troăng khu pú hên.

Xua mê, pơreăng kân COVID-19 hiăng tơdjâk kân troh tơdroăng pêi cheăng dêi Kuô̆k hô̆i. Pôa Vương Đình Huệ, Kăn xiâm hnê ngăn Kuô̆k hô̆i kheăn kơdeăn, mơnhên tơdroăng ki pleăng hnoăng cheăng tá hiâm mơno, pôu râng hnoăng cheăng, tuăn ngôa rơkê dêi tâi tâng kăn ƀô̆, kŏng chưk, viên chưk, mơngế pêi cheăng ối tung ƀơrô Kuô̆k hô̆i, pói vâ, hơnăm 2022, rêm ngế kăn ƀô̆, kŏng chưk, viên chưk, mơngế pêi cheăng ối tung Ƀơrô Kuô̆k hô̆i thế rơkê tâ mê nếo, tơtro tâ, pôu râng hnoăng cheăng tâ ƀă rŭm môi tuăn tâ, vâ châ tơƀrê lĕm tâ hơnăm 2021.

A Sa Ly tơplôu ƀă tơbleăng