VOV4.Xơ Đăng - Kơxê măng lơ 24/1, drêng hbrâ tơdah Têt Nhâm Dần 2022, Pôa Vương Đình Huệ, Kăn xiâm hnê ngăn Kuô̆k hô̆i ƀă Khu kăn ki pêi dêi hnoăng cheăng dêi Tơnêi têa hiăng veăng a rôh po tơdroăng “Rơnó Hơngui tơkăng kong phâi hơtô hiâm mơno kuăn pơlê têa kơxĭ” a Đông mô đô̆i gak tơkăng kong Rạch Gốc, tơring Ngọc Hiển, kong pơlê Cà Mau. Tơpui a rôh po tơdroăng, pôa Vương Đình Huệ, kăn xiâm hnê ngăn Kuô̆k hô̆i phiu ro hlo tơdroăng, maluâ ối trâm hên xơpá, la kăn ƀô̆, lêng Mố đô̆i gak tơkăng kong Cà Mau tối tơdjuôm, Đông mô đô̆i gak tơkăng kong Rạch Gốc tối krê, đi đo rak vế rơdêi hnoăng cheăng a tíu pêi cheăng, tơrŭm, môi tuăn, tơbleăng tơdâng tơ’mô mâu troăng hơlâ hnoăng cheăng, ‘nâi nhên mâu tơdroăng cheăng a tíu tơkăng kong, rak vế krá tơniăn hnoăng pơkuâ chuăn, kơpong têa kơxĭ dêi kong pơlê.

Pôa Vương Đình Huệ tối nhên, malối, tung rôh Têt Lo hơnăm nếo Nhâm Dần hiăng vâ troh, kăn ƀô̆, lêng mố đô̆i gâk tơkăng kong kong pơlê Cà Mau hiăng tơrŭm krá tơniăn ƀă khu râ Đảng, khu kăn pơkuâ, rak ngăn Têt ăm kuăn pơlê mâu cheăng ki a kĭng têa kơxĭ; tơmâng ngăn tŏng kum mâu rơpŏng ki ai hnoăng ƀă kăch măng, rơpŏng ai troăng hơlâ tŏng kum, rơpŏng kơtiê, vâi hdrêng, hok tro a cheăm châ tơdah rơnó Hơngui phâi tơtô, ai tŭm tơdroăng, ƀă hơniâp ro.

A hneăng pôu kố, pôa Vương Đình Huệ ƀă mâu ngế cheăng tung khu ki pêi dêi hnoăng cheăng dêi Tơnêi têa hiăng diâp 750 hnoăng tơmeăm ăm Đông gak tơkăng kong Rạch Gốc, mâu khu lêng ki hbrâ mơdât pơreăng, rơpŏng ai hnoăng tơnêi têa, rơpŏng kơtiê, rơpŏng xơpá a tơring Ngọc Hiển.

Hdrối mê, pôa Vương Đình Huệ, Kăn xiâm hnê ngăn Kuô̆k hô̆i hiăng lăm pôu rơkâu Têt ăm mâu kăn ƀô̆, mâu lêng tơplâ dêi Tiêuh đoân U Minh 2 ƀă mâu ngế pêi cheăng a cheăm Phong Điền, tơring Trần Văn Thời, kong pơlê Cà Mau. Tiêuh đoân U Minh 2 cho tiêuh đoân cơ đô̆ng tơplâ ki ó dêi kong pơlê, cho tíu pêi cheăng ki xiâm tung hbrâ tơplâ dêi kuăn pơlê ƀă mâu lêng kong pơlê Cà Mau tung rôh tơplâ xâ Mih, tơplâ kring vế tíu tơkăng kong Peăng mâ hâi lu pa Hdroh ƀă pêi tơdroăng cheăng kum kong têa Kul.

Tơbleăng tối a Tiêu đoân U Minh 2, pôa Vương Đình Huệ khĕn kơdeăn  mâu hnoăng ki tíu pêi cheăng hiăng châ pêi tơ-ƀrê, púi vâ mâu kăn ƀô̆, mâu lêng tơplâ pơtối rak vế troăng rơhlâ kăch măng khên tơnôu, djâ troăng ahdrối, pê klêi hnoăng cheăng ki Đảng, Tơnêi têa ƀă kuăn pơlê tơngah pơcháu.

Gương + Katarina Nga tơplôu ƀă tơbleăng