Mâu hâi ki kố, kuăn pơlê cheăm Ba Vinh, môi tung 5 cheăm ối tung kơpong Tơniăn kơpong tơring Ba Tơ, kong pơlê Quảng Ngãi dế thâ kếo xo dêi loăng keo lai. Kố cho môi tung mâu loăng plâi kum kuăn pơlê hdroâng kuăn ngo Hre a Ba Tơ hluăn ing kơtiê. Ing kơpong tơnêi kơtiê pá puât, troh nôkố, kuăn pơlê hiăng ‘nâi pêt báu, pêt loăng keo, păn mơnăn mơnôa xo ki rĕng châ tê păn ki hrá châ tê xua mê tơdroăng rêh ối chôa ‘lâng pơhlêh. Pôa Phạm Văn Nhít, ối a cheăm Ba Vinh, tơring Ba Tơ tối ăm ‘nâi:

‘’Thôn ngin ai hên, rơpŏng hên mê to lâi chât hectar, rơpŏng ki iâ mê to lâi hectar, 2,3 hectar. Ôh tá tro lŭp tơmeăm mê lôi 5 hơnăm, môi hectar châ hrĭng tâ̆n. Liăn ki châ xo mê lôi pro hngêi, rôe rơxế, ăm kuăn lăm hriâm’’.

Kơpong tơniăn kơpong Ba Tơ, kong pơlê Quảng Ngãi ối a drô troăng kân Tơnêi têa 24 kơdrâm phiu ro tơdjêp ƀă Tây Nguyên kân rơdâ. Mâu troăng kân lĕm, châ mơ’no liăn mơjiâng a Tíu xiâm kơdrâm phiu ro Ba Tơ xuân cho mơ’no liăn cheăng ăm kơpong tơniăn kơpong, ƀă kơxô̆ liăn châ hrĭng rơtal liăn. Mê cho mâu troăng kân Trần Quý Hai, 30/10, Trần Toại...

Pêi pro mâu Tơdroăng 30a, 135, mâu hơnăm hiăng hluâ, tơring Ba Tơ, kong pơlê Quảng Ngãi tơkŭm mơ’no liăn cheăng mơjiâng hngêi trăng troăng klông kih thuât, pơlê pơla; pêi pro mâu tơdroăng tơkêa bro, troăng pêi pêt mơjiâng tơmeăm vâ mơnhông cheăng kâ - rêh ối pơlê pơla. Mâu kong pơlê ối tung kơpong Tơniăn kơpong hiăng ai hên pơhlêh. 100% kơxô̆ cheăm tung tơring ai troăng rơxế ô tô troh tơdế cheăm, 100% cheăm ai hngêi pơkeăng cheăm, hngêi trung hriâm... Troh nôkố, pêi lo liăn rêm ko mơngế châ lối 8,7 rơtuh liăn/hơnăm, pêt mơjiâng tơmeăm pêi lo ing chiâk deăng pơhlêh tiô troăng châ tơƀrê ƀă dâi lĕm.

Ki rơhêng vâ tối, tơdroăng xúa mâu troăng khoa hok ƀă kŏng ngê̆ tung pêt kơtếo a tơnêi ki a’ngêi, ngo ngối vâ kơdroh tơnêi tro mơhiu châ tơƀrê. Khu pơkuâ cheăng Đảng tơring Ba Tơ hiăng pơkâ mơnhên thế tơkŭm rak ngăn, gâk ngăn kong ki dế ai nôkố, mơdêk pêt kong vâ pro kro mơdrŏng, thăm tơdroăng rak ngăn tơdroăng păn mơnăn mơnôa, pơkuâ ƀă pêi pro lĕm tro tơmeăm ki ai hlâu dêi kong, tơniăn kong prâi krá tơniăn.

Tơring Ba Tơ mơnhên, pêt lo ki vâ pro tơmeăm cho môi tung mâu tơdroăng ki vâ mơnhông cheăng kâ krá tơniăn ƀă xăm kơklêa, kơdroh kơtiê, kum hên tung tơdroăng rak vế kong prâi kong kế. Rêm hơnăm, lâp tơring pêt vâ chê 6,600 hectar kong kêo ki vâ pro tơmeăm, troh nôkố ƀăng kong pêt mơjiâng tơmeăm tung tơring châ vâ chê 66.000 hectar, mơdêk ki xâp rơngiâp dêi kong tâk troh 66% tâi tâng ƀăng deăng. Kơnôm pêt loăng keo ki vâ pro tơmeăm, hên rơpŏng a Ba Tơ hiăng mơ-eăm hluăn ing kơtiê, ai tơdroăng rêh ối kro mơdrŏng. Pôa Trần Duy Thảo, 72 hơnăm ối a cheăm Ba Động, môi tung 4 cheăm mơnhông má môi a kơpong Tơniăn kơpong Ba Tơ kố tối:

‘’Pơhlêh má môi cho hngêi trăng, troăng klông, mơjiâng kân lĕm rơdâ, hngêi trung, hngêi pơkeăng cheăm phuâng lĕm. Hdrối nah ai mâu cheăm ôh tá ai troăng troh tíu xiâm cheăm mê nôkố pơrá ai mê troăng kân châ tôh chá kơxu. Ƀă hngêi pơkeăng cheăm, tơdroăng khăm xuân tơniăn, ki dâi lĕm ƀok thái pơkeăng tơxâng tiô tơdroăng kal vâ. Ƀă tơring Ba Tơ, tâi tâng cho kuăn pơlê hdroâng kuăn ngo nôkố xuân mơnhông ó rơdêi, mơ-eăm dêi rêm rơpŏng’’.

Tơring kong ngo Ba Tơ, kong pơlê Quảng Ngãi ai vâ chê 84% mơngế hdroâng kuăn ngo Hre. Kơpong tơnêi kố cho tíu tơkŭm po roh Xông tơplâ xâ Ba Tơ tơdroăng roh ton nah hâi lơ 11/3/1945, tíu mơjiâng Khu yu kĭch Ba Tơ rơxông apoăng xông tơplâ xâ.

Pôa Đinh Ngọc Vỹ, Kăn pơkuâ hnê ngăn cheăng Đảng tơring Ba Tơ, mơngế hdroâng Hre đi đo tơmiât vâ mơnhông pơlê xiâm. Klêi vâ chê môi hneăng pêi pro Pơkâ Hneăng hôp Đảng ƀô̆ tơring roh má XIX, ki rơhêng vâ tối cho hơnăm 2024, Ba Tơ hiăng mơnhên ƀă hên tơdroăng châ tơƀrê hên. Tâi tâng ki kơnâ tê tơmeăm ki pêt mơjiâng châ lối 2.300 rơtal liăn, châ lối 100% pơkâ pêi, tâk 9,96% tâng pơchông ƀă roh kố hơnăm 2023.

Pêi lo liăn tơdâng ko mơngế châ vâ chê 50,7 rơtuh liăn/môi ngế/hơnăm, tâk 4 rơtuh liăn tâng pơchông ƀă hơnăm 2023. Đảng ƀô̆ tơring Ba Tơ tơtrŏng tơdroăng xăm kơklêa, kơdroh kơtiê. Tâng môi tiah hơnăm 2021, tơring ai vâ chê 6.000 rơpŏng kơtiê mê troh mơ’nui hơnăm 2024 kơdroh u ối lối 2.800 rơpŏng, châ 15,95%... Pôa Đinh Ngọc Vỹ tối ăm ‘nâi, troh nôkố, tâi tâng mâu cheăm kơpong tơniăn kơpong hiăng pêi pro klêi tơdroăng ‘nhê tah hngêi pơtân, hngêi xi kơchoh pro ăm hngêi nếo ăm rơpŏng kơtiê, rơpŏng ai hnoăng tơnêi têa. Tơring mơ-eăm mơ’nui hơnăm kố, djâ kơlo têk chu rơpŏng kơtiê kơdroh chu u ối 4,72%.

‘’Ba Tơ hiăng tơkŭm hên kơxô̆ liăn ăm mơnhông mâu cheăm kơpong Tơniăn, ki má lối cho mơ’no pro hngêi trăng, troăng klông, hngêi trung hriâm, hngêi pơkeăng vâ tơniăn kuăn pơlê kơpong tơniăn lĕm tro tâ; Xua mâu kơxô̆ liăn, mâu kơxô̆ liăn ki pêi pro tơdrêng vâ pêi pro mơnhông cheăng kâ - rêh ối pơlê pơla kơpong tơniăn kơpong. Nôkố, ai 1 cheăm kơpong tơniăn rĕng châ plah thôn pơlê nếo hơnăm 2019. Mâu cheăm ki ê ai tơdroăng pơhlêh hên tung mơnhông cheăng kâ - rêh ối pơlê pơla, kơdroh kơtiê krá tơniăn ƀă pơhlêh tơdroăng rêh ối kuăn pơlê môi tiah cheăm Ba Dinh, Ba Vinh ƀă Ba Thành. Tung la ngiâ pơtối mơ-eăm mâu cheăm pơrá châ plah thôn pơlê nếo hneăng hơnăm 2026 – 2030, kơdroh kơlo têk chu rơpŏng kơtiê, vâ chê kơtiê, mơdêk kơlo rêh ối dêi kuăn pơlê’’.